काठमाडौं (हाम्रो खेलकुद) – बासुदेव जोशी सुदूरपश्चिम प्रादेशिक क्रिकेट संघको अध्यक्षमा निर्वाचित भएका छन् । शनिबार भएको सुदूरपश्चिम प्रादेशिक संघको चुनावमा जोशी निर्विरोध अध्यक्षमा निर्वाचित भएका हुन् ।

जोशी नेपाली क्रिकेट टोलीको छनोटसमितिको सदस्य समेत हुन् । अध्यक्षसहित १३ सदस्य समितिनै निर्विरोध रुपमा चयन भएको छ । उपाध्यक्ष पदमा रमेश बहादुर बोहोरा, सचिवमा लक्ष्मण दत्त भट्ट र कोषाध्यक्षमा दीनेश बहादुर सिंह निर्विरोध चुनिएका छन् ।

त्यस्तै हरि रेग्मी, शेर सिंह खत्री, तेज कार्की, अनिल कुँवर, माया रावत साँउद, रमेश बहादुर चन्द, जोग बहादुर दौल्याल, बाबुराजा श्रेष्ठ र आषिश कुमार खत्री सदस्यमा नियुक्त भएका छन् ।

नेपाल क्रिकेट संघ (क्यान) को केन्द्रिय चुनाव असोज पहिलो साता हुँदैछ । त्यसअघि जिल्ला र प्रदेश चुनाव हुनेछ । सबै ४५ जिल्लाको चुनाव सकिएको छ । अव बाँकी ६ प्रदेशको चुनाव हुनेछ । बागमती प्रदेशमा नेपाली क्रिकेट टोलीका पूर्वाकप्तान पारस खड्का अध्यक्षमा लड्ने छन् ।

केन्द्रिय चुनावमा ४५ जिल्ला, ७ प्रादेशिक क्रिकेट संघ, अम्पायर र स्कोरर संघ तथा प्रशिक्षक संघ र वर्तमान कार्यसमितिले मतदान गर्ने प्रक्रिया रहेको छ ।

क्रिकेट संघमा १७ कार्यसमिति सदस्य रहेपनि हाल उपाध्यक्ष राजबाबु श्रेष्ठ र सचिव अशोकनाथ प्याकुरेलको राजिनामासँगै १५ सदस्यले मात्र केन्दीय चुनावमा मतदान गर्नेछन् । क्यान निर्वाचनमा कुल ८८ मत रहेकोमा २ कार्यसमिति पद रिक्त हुँदा ८६ मत हुनेछ ।