काठमाडौं (हाम्रो खेलकुद) – नेपाली क्रिकेट टोलीका सहायक प्रशिक्षक वसन्त शाही ठकुरले एसिया कपमा नेपालले भारत र पाकिस्तानविरुद्ध खेल्दा गुमाउनु पर्ने केहि नभएको बताएका छन् । टियुमा बन्द प्रशिक्षणमा ब्यस्त भएका शाहीले उक्त प्रतिक्रिया दिएका हुन् ।

‘भारत र पाकिस्तान विश्वकै क्रिकेटमा दुई ठूला टिम हुन् । उनीहरुसँग खेल्नु नै एउटा सौभाग्य पनि हो । ठूलो टोली हो भन्दैमा हामी आतिएका पनि छैनौं । हामीले गर्ने भनेको राम्रो क्रिकेट खेल्ने प्रयास गर्ने हो । तर नतिजा हाम्रो हातमा हुँदैन । हाम्रो प्रयास उनीहरुविरुद्ध जसरी पनि राम्रो खेल्ने हुनेछ । हामी टोली को छ भनेर हेर्ने छैनौं । हाम्रो तर्फबाट शतप्रतिशत दिने प्रयास गर्ने छौं’, शाहीले भने ।

‘यो प्रतियोगिता खेल्न टिम उत्साहित छ । हामीले दबाब लिएका छैनौं । हामीलाई गुमाउनु केहि पनि छैन । केहि गरि हामीले राम्रो गर्न सके ठूलो उपलब्धी हुनेछ । अस्ति मात्रै युएईले न्युजिल्यान्डलाई हराएको अवस्था छ । हामी पनि टेस्ट टोलीलाई हराउने नजिक नजिक थियौं । विश्वकप छनोटमा आयरल्यान्डलाई झण्डै हराई सकेका थियौं । क्रिकेटमा असम्भव केहि छैन’, उनले भने ।

गतवर्ष मुख्य प्रशिक्षक मोन्टी देशाई आएपछि शाही सहायह प्रशिक्षक छन् । उनले नेपाली यू-१९ टोलीको मुख्य प्रशिक्षकको रुपमा काम गरि सकेका छन् । लुम्बिनी प्रदेशका मुख्य प्रशिक्षक समेत हुन् । उनले मोन्टी आगमनले खेलाडीको मानसिकता परिवर्तन भएको बताएका छन् ।

नेपालका पहिलो ब्याचका खेलाडी समेत रहेका शाहीको पूरा भिडियो हेर्नुहोस् :