काठमाडौं (हाम्रो खेलकुद) –कोशी प्रादेशिक क्रिकेट संघको अध्यक्षमा सर्वजित पाण्डे निर्वाचित भएका छन् । मंगलबार झापामा भएको निर्वाचनमा सर्वजितले अर्का अध्यक्षका प्रत्याशि बिप्लव घोषलाई पराजित गरेका हुन् । पाण्डेले १९ र घोषले १३ भोट प्राप्त गरे ।

त्यस्तै उपाध्याक्षमा अनुप ढुंगाना १८ भोटका साथ विजयी भएका हुन् । उनले अर्का उपाध्यक्षका प्रत्याशि प्रविन थापालाई चार भोटले पराजित गरे ।

सचिवमा टिकाराम पुरीले चार भोटले नै अर्जुन पौडेललाई पराजित गर्दै निर्वाचित भए । टिकारामले १८ र अर्जुनले १४ भोट प्राप्त गरे ।

कोषाध्यक्षमा बिरु श्रेष्ठले चेतनाथ पौडेललाई पाँच भोटले हराउँदै जितेका छन् । बिरुले १९ र चेतनाथ पौडेलले १३ भोट प्राप्त गरे ।
सदस्यहरुमा सुरेश गुरागाँई, सुमेश कुमार हलुवाई, शिवकुमार यादव, सचित आनन्द सुब्बा, मिङ्मा डन्डु शेर्पा, नारद नेपाल, नवीन घिमिरे, रामकृष्ण आचार्य र अम्बिका बुढाथोकी विजयी भएका छन् ।

नेपाल क्रिकेट संघ (क्यान) को केन्द्रिय चुनाव असोज पहिलो साता हुँदैछ । त्यसअघि जिल्ला र प्रदेश चुनाव हुनेछ । सबै ४५ जिल्लाको चुनाव सकिएको छ । अव बाँकी पाँच प्रदेशको चुनाव हुनेछ । सुदूरपश्चिम प्रदेशमा बाशुदेव जोशी सर्वसम्मत रुपमा अध्यक्ष जितेका थिए ।

बागमती प्रदेशमा नेपाली क्रिकेट टोलीका पूर्वाकप्तान पारस खड्का अध्यक्षमा लड्ने छन् । केन्द्रिय चुनावमा ४५ जिल्ला, ७ प्रादेशिक क्रिकेट संघ, अम्पायर र स्कोरर संघ तथा प्रशिक्षक संघ र वर्तमान कार्यसमितिले मतदान गर्ने प्रक्रिया रहेको छ ।

क्रिकेट संघमा १७ कार्यसमिति सदस्य रहेपनि हाल उपाध्यक्ष राजबाबु श्रेष्ठ र सचिव अशोकनाथ प्याकुरेलको राजिनामासँगै १५ सदस्यले मात्र केन्दीय चुनावमा मतदान गर्नेछन् । क्यान निर्वाचनमा कुल ८८ मत रहेकोमा २ कार्यसमिति पद रिक्त हुँदा ८६ मत हुनेछ ।

क्यान चुनाव र कस्ले भोट हाल्न पाउने बारे सम्पूर्ण जानकारी यो भिडियोमा हेर्नुहोस् ।