एजेन्सी – स्पिनर सामु कमजोर सावित बनेपछि पाकिस्तानले पहिलो ओडिआई खेलमा अफगानिस्तानलाई २ सय २ रनको मध्यम लक्ष्य दिएको छ । श्रीलंकाको महिन्दा राजपक्ष इन्टरनेशल रंगाशालामा टस जितेर पहिला ब्याटिङ रोजेको पाकिस्तान ४७.१ ओभरमा २ सय १ रनमा अल आउट भयो ।

पाकिस्तानका ओपनर इमाम उल हकले ९४ बलमा २ चौकासहित सर्वाधिक ६१ रनको योगदान दिए । उनी मोहम्मद नाबीको बलमा राशिद खानबाट समातिन पुगे ।

ओपनर फखार जमान २ रनमै तीव्र गतिका बलर फजलहक फारुकीको बलमा क्याच आउट भए । पाकिस्तानका १० मध्य ८ खेलाडी अफगानिस्तानको स्पिनरको शिकार बने । बाँकी दुई एक रन आउट र एक तीव्र गतिका बलरमा आउट भए ।

पाकिस्तानका कप्तान बाबर आजम शून्यमा आउट हुनु ठूलो भारी पर्यो । स्पिनर मुजिब उर रहमानले बाबरलाई शून्यमा एलबीडब्लू आउट गरेपछि पाकिस्तान सम्हाल्लिन सकेको थिएन ।

मोहम्मद रिजवान २२ बलमा ४ चौकासहित २१, अघा सलमान ७, उस्मा मिर र शाहिन शाह अफ्रिदी समान दुई रनमा आउट भए ।

मध्यक्रमका ब्याटर इफ्तिखर अहमद ३० र शादब खान ३९ रनमा आउट भए । नसिम शाहसँग तालमेल नमिल्दा नन स्ट्राइकमा मुजिबको डाइरेक्ट थ्रोमा शादब पेभेलिएन फर्किनु परेको थियो । नसिम शाह २७ बलमा २ चौकासहित १८ रनमा अविजित रहे ।

अफगानिस्तानका स्पिनर मुजिब उर रहमानले १० ओभरमा १ मेडनसहित ३३ रन खर्चेर ३ विकेट लिए । मोहम्मद नाबीले १० ओभरमा ३४ रन खर्चेर २ विकेट लिए । प्रमुख स्पिनर राशिद खानले १० ओभरमा ४२ रन खर्चेर २ विकेट लिए । रमात शाह र फारुकीले समान एक विकेट लिए ।