काठमाडौं (हाम्रो खेलकुद) – अन्तर्राष्ट्रिय अम्पायर समेत रहेका सञ्जय कान्त सिग्देल गण्डकी प्रादेशिक क्रिकेट संघको क्रिकेट अध्यक्षमा निर्वाचित भएका छन् । सिंग्देलसहित १२ सदस्य समिति गण्डकीले सर्वसम्मत रुपमा निर्वाचन गरेको छ ।

त्यस्तै प्रकाश पौडेल उपाध्यक्ष, ग्रेट हिमालय क्रिकेट एकेडेमीका सञ्चालक समेत रहेका सुमनराज कार्की सचिव र पूर्व क्रिकेटर दीवाकर थापा कोषाध्यक्षमा निर्वाचित भएका छन् । द्रवेन्द्र प्रजु, ऋषिराम गौतम, फणिन्द्र बहादुर खड्का, धामनाथ सापकोटा, रेशम बहादुर केसी, विध्यादेवी भट्टाई, भोजराज बराल र सन्तोष शर्मा सदस्यमा निर्वाचित भएका छन् ।

योसँगै तीन प्रादेशिक चुनाव सम्पन्न भएको छ । सुदूरपश्चिमबाट बाशुदेव जोशी र कोशीबाट सर्वजित पाण्डे विजयी भएका थिए । अव अन्य चार प्रदेशको चुनाव हुँदैछ । बागमती प्रदेशमा नेपालका पूर्वकप्तान पारस खड्का अध्यक्षमा उठ्नेछन् ।

क्यानको सदस्यता प्राप्त ४५ जिल्लाको चुनाव सकिएपछि प्रदेश सुरु भएको छ । आगमी दुई साताभित्र बाँकी चार प्रदेशको पनि सकिनेछ । त्यसपछि केन्द्रको चुनाव हुनेछ । केन्द्रमा कुल ८६ भोट हुनेछ । केन्द्रिय चुनावमा ४५ जिल्ला, ७ प्रादेशिक क्रिकेट संघ, अम्पायर र स्कोरर संघ तथा प्रशिक्षक संघ र वर्तमान कार्यसमितिले मतदान गर्ने प्रक्रिया रहेको छ ।

क्रिकेट संघमा १७ कार्यसमिति सदस्य रहेपनि हाल उपाध्यक्ष राजबाबु श्रेष्ठ र सचिव अशोकनाथ प्याकुरेलको राजिनामासँगै १५ सदस्यले मात्र केन्दीय चुनावमा मतदान गर्नेछन् । क्यान निर्वाचनमा कुल ८८ मत रहेकोमा २ कार्यसमिति पद रिक्त हुँदा ८६ मत हुनेछ ।