एजेन्सी – उपाधि दाबेदार पाकिस्तानले एसिया कपमा नेपालसँग उद्धघाटन खेल खेल्नुअघि अन्तिम टोलीमा एक परिवर्तन गरेको छ । पाकिस्तानले बायाँ हाते ब्याटर साउद सकीललाई १७ सदस्य टोलीमा थपेको छ ।

साउद टोलीमा पर्दा तयाब ताहिरलाई वैकल्पिक खेलाडीमा राखेको छ । २७ वर्षीय साउदले पाकिस्तानबाट ६ ओडिआई खेलमा ७६ रन बनाएका छन् । उनले ७ टेस्टमा २ शतक र ६ अर्धशतकसहित ८ सय ७५ रन बनाएका छन् ।

उनी टेस्ट इतिहासमा सुरुवाती सातै खेलमा ५० माथि रन बनाउने एक्लो ब्याटर हुन् । अघिल्लो महिना श्रीलंकाविरुद्ध उनले २ सय ८ रनको अविजित दोहोरो शतकीय इनिङ खेलेका थिए । बायाँ हातेसँगै मध्यक्रममा स्पिन राम्रो खेल्ने हुँदा उनलाई टोलीमा समेट्ने निर्णय लिएको हो ।

अघिल्लो महिना पाकिस्तान एलाई एसिसी इमर्जिङ टिम्स एसिया कपको उपाधि जिताउन तयाब ताहिरले भारत ए विरुद्ध १ सय ८ रनको सानदार शतकीय इनिङ खेलेका थिए ।

अफगानिस्तानसँग तीन ओडिआई खेलको सिरिज खेलेर श्रीलंकाबाट पाकिस्तानको टोली आज स्वदेश फर्किनेछ । बाबर आजम, इमाम उल हक र नसिम शाह लाहोर जानेछन् । सोमबार मात्रै यी तीन खेलाडी मुल्तानमा टोलीसँग जोडिनेछन् । पाकिस्तानले ३० अगष्टमा नेपाल र २ सेप्टेम्बरमा भारतसँग खेल्ने तालिका छ ।

पाकिस्तानको एसिया कप खेल्ने टोली :

बाबर आजम (कप्तान), अब्दुल्लाह शफिक, फखार जमान, हारिस रौफ, इफ्तिखर अहमद, इमाम उल हक, मोहम्मद हरिस, मोहम्मद नवाज, मोहम्मद रिजवान, मोहम्मद वासिम जुनियर, नसिम शाह, सलमान अली अघा, शादब खान(उपकप्तान), शाहिन शाह अफ्रिदी, साउद सकिल, उस्मा मिर, फहिम अशरफ ।