एजेन्सी – नेपालले बुधबार एसिया कपको उद्धघाटन खेलमा घरेलु टोली पाकिस्तानसँग खेल्दै डेब्यू गर्नेछ । नेपाल र पाकिस्तानबीचको खेल दिउँसो ३: ४५ मा मुल्तान रंगशालामा हुनेछ ।

नेपालले टस हार्दा र वा जित्दा दुबैमा पहिला बलिङ गर्ने सम्भावना बढी देखिन्छ । वर्तमान ओडिआई विश्व वरियताको शीर्ष टोली पाकिस्तानसँग सुपरस्टार खेलाडीको बाहुल्यता छ । कप्तान बाबर आजम, मोहम्मद रिजवान र फखार जमान ब्याटिङका स्टार हुन् । बाबर आजमलाई वर्तमान समयका विश्व क्रिकेटकै उत्कृष्ट ब्याटर भन्ने गरिन्छ । पाकिस्तानको मुख्य खुबी भनेको नै तीव्र गतिको बलिङ आक्रामण हो ।

हाल पाकिस्तानको तीव्र गतिको बलिङ आक्रामण विश्वकै उत्कृष्ट मानिन्छ । पाकिस्तान, अष्ट्रेलिया, इंग्ल्यान्ड, दक्षिण अफ्रिका र न्युजिल्यान्डको तीव्र गतिको बलिङ सधैं हतियार मानिन्छ । पाकिस्तानले २०२१ को टि२० विश्वकपमा सेमिफाइनल र २०२२ को टि२० विश्वकपको फाइनल खेल्नुको मुख्य कारण तीव्र गतिको बलिङ आक्रामण प्रमुख कारण हो ।

बायाँ हाते तीव्र गतिका बलर शाहिन शाह अफ्रिदी, हरिस रौफ र नसिम शाह पाकिस्तानको पहिलो रोजाईमा खेल्नेछन् । अफ्रिदी विश्व क्रिकेटका हालका उत्कृष्ट बलर हुन् । उनको गति, योर्कर र इनस्वींग बलको सामना गर्न विश्वस्टार ब्याटरलाईनै कठिन पर्दै आएको छ ।

२०२१ को टि२० विश्वकपमा भारतविरुद्ध उनको प्रदर्शन एक उदाहरण हो । विराट कोहली, लोकेश राहुल र रोहित शर्मा जस्ता ब्याटर निराश हुनु परेको थियो । विश्वका सबै चर्चित ब्याटर अफ्रिदीको गति र इनस्वींग बल खेल्न संघर्ष गर्दै आएका छन् ।

अफ्रिदीले १ सय ५५ प्रतिघण्टा किलोमिटरको गतिमा बलिङ गर्ने गर्दछन् । उनको त्यो गतीसँगै इनस्वींग र योर्कर बल कमै ब्याटरले चाल पाउन सक्छन् । नयाँ बलका साथ अफ्रिदीले सुरुवात गर्नेछन् । अर्को एन्डबाट स्वींग, बाउन्स र उछालका साथ नसिम शाहले दबाबमा राख्दने गर्दछन् । नसिम पनि १ सय ५२ प्रतिघण्टाको गतिमा बलिङ गर्ने खुबी राख्छन् ।

हरिस रौफ वर्तमान पाकिस्तान टोलीको सबैभन्दा तीव्र गतिमा बलिङ गर्ने गर्दछन् । उनले प्रतिघण्टा १ सय ५५ माथि किलोमिटरको गतिमा बलिङको क्षमता राख्छन् । उनी गतिसँगै योर्कर, एन्थ र लाइनमा बढी बल राख्ने गर्दछन् ।

२०१९ को एकदिवसीय विश्वकप यता पाकिस्तानका तीव्र गतिका बलरले मात्रै ३० खेलमा १ सय ६६ विकेट लिएका छन् । अघिल्लो साता पाकिस्तानले अफगानिस्तानलाई पहिलो ओडिआईमा मात्रै ५९ रनमा अल आउट गरेको थियो । सबै तीव्र गतिका बलरले विकेट लिएका थिए ।

तीव्र गतिका बलरविरद्ध नेपाली ब्याटरको इतिहास राम्रो छैन । नेपालले औसतमा १३०/३५ को बलिङ गतिमा रन बनाउन संघर्ष गर्दै आएको छ । नेपाली ब्याटरले स्पिन उत्कृष्ट खेल्दा तीव्र गतिका बलरमा संघर्ष गर्दै आएका छन् ।

अघिल्लो महिला एसिसी इमर्जिङ टिम्स एसिया कप र विश्वकप छनोटमा विपक्षी टोलीका तीव्र गतिका बलर हाबी बनेका थिए । पाकिस्तान ए का दोस्रो रोजाईका बलर मोहम्मद वासिम जुनियर र शाहबाज दाहानीले नेपालको ब्याटिङ धरासयी बनाएका थिए ।

दाहानीले पाँच र जुनियरले चार विकेट लिएपछि नेपाल १ सय ७९ रनमा अल आउट भएको थियो । पावर प्लेमा नेपाल ३९-६ को दयनीय अवस्थामा पुगेको थियो । सोमपाल कामीले तल्लोक्रममा ७५ रन बनाउँदै साख जोगएका थिए । औसतमा जुनियर र दाहानीको बलिङ गति १४० को आसपासमा हुने गर्दछ ।

विश्वकप छनोटमा नेदरल्यान्ड्सका लोगन भान बीक, युएईका मोहम्मद जवादुल्लाह, स्कटल्यान्डका ब्रेन्डन म्याकमुलेन र क्रिस सोल जस्ता बलर हाबी हुँदै आएका छन् । वेस्टइन्डिजका अल्जारी जोशेफ र स्कटल्यान्डका क्रिस सोल नेपालले सामना गरेका हालसम्मका सर्वाधिक गतिका बलर हुन् । यी दुई बलर प्रतिघण्टा १४५/५० को आसपासमा गर्ने गर्दछन् ।

पाकिस्तानको बलिङ आक्रामण नेपाली ब्याटरले सामना गर्ने हासम्मकै उच्च गतिको हुनेछ । दुवै एन्डबाट लगातार १ सय ४५ माथिको गतिको सामना गर्नुपर्ने हुन्छ । नेपाली ब्याटरलाई पाकिस्तानी बलरको गतिको चाल पाउन कठिन पर्नसक्छ । गति मात्रै होईन पाकिस्तानी बलरमा स्वींग, बाउन्स र उछाल पनि त्यतिनै हुने गर्दछ ।

नेपालका कप्तान रोहित पौडेलले एसिया कप खेल्न जानुअघि सर्ट बलका लागि विशेष तयारी गरिरहेको बताएका थिए । ‘पहिला हामी त तयार छौं । सर (मोन्टी देशाई) ले भनेजस्तै सर्ट बलमा पुल हान्न नसकेपनि अरु सर्टहरु हान्न सकिन्छ कि । १५ दिनदेखि क्याम्प नभएपनि त्यो कुरामा सबै खेलाडी आफैं आएर मिहिनेत गरेका थिए । पक्कैपनि त्यसको नतिजा आउने खेलहरुमा देखिन्छ । सरसँग त्यो सर्टहरु कसरी खेल्ने भनेर हामी ग्रुपमा छलफल गरि राखेका हुन्छौं । मलाई लाग्छ हामीले तयार गरेका छौं र आउने दिनमा राम्रो नतिजा आउँछ’, रोहितले सर्ट बल बारे भनेका थिए ।

नेपाली क्रिकेट टोलीका पूर्व मुख्य प्रशिक्षक जगत टमाटाले नेपाली ब्याटरले कमजोर बललाई धर्यता गरेर खेल्नु पर्ने बताउँछन् । ‘हामीले एउटा राम्रो अवसर पाएका छौं । विश्वको नम्वर वान टोलीसँग खेल्दै छौं । खेलाडीमा फरक किसिमको जोश छ । खेलाडीले जिम्मेवारी लिनुपर्छ । उनीहरुको राम्रो बललाई सम्मान र नराम्रो बलमा रन बनाउनु पर्यो । ५० ओभर नै खेल्ने जिम्मेवारी लिएर खेलेपछि त्यति साह्रो गाह्रो नहोला’, टमाटाले भने ।

पहिला पनि गति खेलेको टमाटा बताउँछन् । ‘हाम्रो केटाहरुले पहिला पनि पेश खेलेको छ । वेस्टइन्डिजसँग खेलेको छ । राम्रो बललाई सम्मान गरेर खेल्यौ भने हामी राम्रो खेल्न सक्छौं । तर अलिकति आक्रामक बन्न खोज्यौ भने नराम्रो गर्न सक्छौं । हामीले उनीहरु र तीव्र गतिको बलरलाई सम्मान त दिनै पर्छ । हामीले नराम्रो बलको धैर्यता गर्न सक्नुपर्छ’, टमाटाले भने ।