काठमाडौं (हाम्रो खेलकुद) – नेपाली क्रिकेट टोलीका कप्तान रोहित पौडेलले एसिया कपमा घरेलु टोली पाकिस्तानविरुद्ध प्रतिस्पर्धात्मक क्रिकेट खेल्ने बताएका छन् । नेपालले बुधबार मुल्तान क्रिकेट रंगशालामा पाकिस्तानसँग नेपाली समय अनुसार दिउँसो ३ : १५ मा खेल्दैछ । त्यसअघि पत्रकार सम्मेलनमा रोहितले नेपालले प्रतिस्पर्धात्मक क्रिकेट खेल्ने बताएका छन् ।

‘हामी पहिलो पटक एसिया कप खेल्दै छौं । यो ठूलो उपलब्धी हो । विशेषगरी नेपालको लागि यो सब पहिलो पटक हो । पाकिस्तान धेरै राम्रो टोली हो । हामी पाकिस्तानविरुद्ध प्रतिस्पर्धात्मक क्रिकेट खेल्न चाहन्छौं । भारतसँग पनि । हो हामी यहाँ आउन योग्य थियौं र त्यसैले यहाँ छौं । भोली हामी प्रतिस्पर्धात्मक क्रिकेट खेल्ने छौं’, पाकिस्तानसँग खेल्नु अघि रोहितले भने ।

रोहितले नेपाल र पाकिस्तानको टोलीमा फरक अनुभव मात्रै बताएका छन् । ‘मलाई लाग्छ नेपाल र पाकिस्तानबीचको फरक भनेको अनुभव हो । क्षमता हेर्ने हो भने ब्याटिङ र बलिङ दुबैको उस्तै हो । पाकिस्तान अनुभवी टोली हो । त्यहिँ एकमात्रै फरक हो’, रोहितले भने ।

‘मलाई लाग्छ दुबै टोलीमा विश्वस्तरिय बलर र ब्याटर छन् । हाम्रो लक्ष्य एक बल युद्ध छ । हामी मात्रै एक बलमा केन्द्रित हुन चाहन्छौं । विपक्षी को भन्दापनि हामी एक बलमा केन्द्रित हुन खोज्नेछौं’, रोहितले भने ।

पाकिस्तानमा नेपाली टोलीलाई राम्रो स्वागत गरिएको थियो । रोहितले उक्त स्वागतमा आफूहरु रमाई राखेको बताएका छन् ।
‘पाकिस्तानमा हाम्रो राम्रो सत्कार गरिएको छ । हामी रमाई राखेका छौं । तिनीहरु राम्रो मान्छेहरु हुन् । रिजवान नेपाल गएको बेला हामीले कुराकानी गरेका थियौं । एसिया कपमा पुन भेटेका छौं । उनले आफ्नो अनुभव साटेका छन् । उत्कृष्ट खेल अघि यो राम्रो सिकाई हो’, रोहितले भने ।

‘आज मैले मुल्तानको विकेट पहिलो पटक हेरेको थियो । विकेट राम्रो छ । हामी आप्नो योजना अनुसार प्रस्तुत हुन चाहन्छौं । मलाई लाग्छ भोली राम्रो खेल हुनेछ’, रोहितले भने ।