काठमाडौं (हाम्रो खेलकुद) – प्रधानमन्त्री पुष्पकमल दाहाल प्रचण्डले एसिया कप क्रिकेट प्रतियोगिता खेल्ने नेपाली क्रिकेट टोलीलाई जितको शुभकामना दिएका छन् ।

बुधबार बिहान पाकिस्तानमा रहेको नेपाली टीमसँग भर्चुअल बैठक गर्दै प्रधानमन्त्री प्रचण्डले जितको शुभकामना दिएका हुन् । शुभकामना व्यक्त गर्दै प्रधानमन्त्रीले प्रतियोगितामा नेपालले राम्रो नतिजा निकाल्ने विश्वास व्यक्त गर्दै खेल क्षेत्रक‍ो विकास र खेलाडीहरूको हितका निम्ति आफूले हमेसा ध्यान दिएको बताएका थिए ।

भर्चुअल बैठकमा नेपाली टीमका क्याप्टेन रोहित पौडेलले टोलीले राम्रो तयारी गरिरहेको र त्यहीअनुसार प्रतिस्पर्धामा प्रस्तुति रहने प्रधानमन्त्रीलाई जानकारी गराएका थिए । नेपाल र पाकिस्तानबीच आज दिउँसो ३ : १५ मा मुल्तानमा खेल हुँदैछ । उता भारतसँग भने भदौ १८ मा खेल्नेछ ।

प्रधानमन्त्रीले क्रिकेट खेलाडीलाई शुभकामना दिएपनि यसअघि घोषणा पुरस्कार रकम भने हालसम्म दिएका छैनन् । आइसिसी विश्वकप लिग-२ त्रिकोणात्मक सिरिजमा नामिबिया र स्कटल्यान्डसँग समान दुई लाख, युएई र पपुवा न्युगिनीसँगको खेलमा समान तीन लाख र एसिसी प्रिमियर कपको उपाधिपछि समान ६ लाख दिने घोषणा गरेको थियो ।

तर सरकारले विभिन्न बाहनामा उक्त रकम दिन सकेको छैन । नेपाली क्रिकेट टोलीका कप्तान रोहित पौडेलले दुई महिना अघि विश्वकप छनोट खेल्न जिम्बावे जानुअघि सार्वजनिक रुपमै उक्त पुरस्कार रकम नपाएको दुखेसो पोखेका थिए ।