एजेन्सी – नेपालका ब्याटर आरिफ शेख र सोमपाल कामी पाकिस्तानका तीव्र गतिका बलर हरिस रौफको बलमा आउट भएका छन् । जितको लागि ३ सय ४३ रनको विशाल विजयी लक्ष्य पछ्याएको नेपालले १७ ओभरमा ५ विकेट गुमाउँदै ८२ रन बनाएको छ ।

१७ औं ओभरको अन्तिम बलमा सोमपाल कामी ४६ बलमा ४ चौकासहित २८ रनमा क्याच आउट भए । सोमपाल हरिस रौफलको बलमा एज लागेर विकेटकिपर मोहम्मद रिजवानबाट उत्कृष्ट क्याच आउटको शिकार हुन पुगे ।

चौथो विकेटका लागि आरिफ शेख र सोमपाल कामीले ७८ बलमा ५९ रनको साझेदारी गरेका थिए । हरिस रौफको बलमा आरिफ क्लिन बोल्ड आउट भए । आरिफले ३८ बलमा ५ चौकासहित २६ रन बनाए ।

पाकिस्तानका तीव्र गतिका बलर शाहिन शाह अफ्रिदीले पहिलो ओभरमै दुई विकेट लिएका थिए । नेपालका ओपनर कुशल भुर्तेलले शाहिन शाह अफ्रिदीलाई सुरुवाती दुई बलमा चौका प्रहार गर्दै सुरुवात गरेका थिए । तर लेग साइडको पाँचौं बलमा एज लागेर विकेटकिपर मोहम्मद रिजवानबाट ९ रनमा क्याच आउट भए ।

लगत्तै अर्को बलमा रोहित पौडेल गोल्डेन डक आउट भए । नसिम शाहको दोस्रो ओभरको चौथो बलमा आसिफ शेख एज लागेर स्लिपमा इफ्तिखर अहमदबाट पाँच रनमा क्याच आउट भए ।

सोमपाल कामीलाई अफ्रिदीको पाँचौं ओभरको दोस्रो बलमा अम्पायरले एलबीडब्लू आउट दिएका थिए । तर सोमपाल कामीले रिभ्यु लिँदै अम्पायरको निर्णय उल्टाएका थिए ।