काठमाडौं (हाम्रो खेलकुद) – नेपालका तीव्र गतिका बलर सोमपाल कामी ओडिआई क्रिकेटमा एकै खेलमा सर्वाधिक रन खर्चिने नेपाली बलर बनेका छन् । सोमपालले एसिया कपमा पाकिस्तानविरुद्ध आफ्नो कीर्तिमान तोड्दै खराब इतिहास बनाएका हुन् ।

सोमपालले पाकिस्तानविरुद्ध १० ओभरमा १ मेडनसहित ८५ रन खर्चिए । त्यो ओडिआईमा कुनैपनि नेपाली बलरले खर्चिएको सर्वाधिक धेरै रन हो ।

यसअघि सोमपालले २०२२ मा पपुवा न्युगिनीविरुद्ध ९ ओभरमा ८१ रन खर्चिएर २ विकेट लिएका थिए । आइसिसी विश्वकप छनोटमा दुई महिना अघि करण केसीले वेस्टइन्डिजविरुद्ध १० ओभरमा ८१ रन खर्चेर १ विकेट लिएका थिए ।

आइसिसी विश्वकप लिग २ को अन्तिम खेलमा यसै वर्षको सुरुवातमा युएईविरुद्ध सन्दीप लामिछानेले १० ओभरमा ८० रन खर्चेर १ विकेट लिएका थिए । सन्दीपले विश्वकप छनोटमा जिम्बावेविरुद्ध १० ओभरमा ७७ रन खर्चिएका थिए ।

त्यसअघि मुल्तान क्रिकेट रंगशालामा टस जितेर पहिला ब्याटिङ रोजेको पाकिस्तानले निर्धारित ५० ओभरमा ६ विकेट गुमाउँदै ३ सय ४२ रन बनाएको थियो ।

पाकिस्तानका बाबर आजमले १ सय ३१ बलमा १४ चौका र ४ छक्कासहित १ सय ५१ रनको सानदार शतकीय इनिङ खेले । इफ्तिखार अहमद ७१ बलमा ११ चौका र ४ छक्कासहित १ सय ९ रनमा अविजित रहे ।