काठमाडौं (हाम्रो खेलकुद) – नेपालले आइसिसी महिला टि२० विश्वकप एसिया क्षेत्र छनोट अन्तर्गत आज घरेलु टोली मलेसियासँग खेल्दैछ । खेल बिहान ७ ः १५ मा मलेसियको कलालाम्पुरमा रहेको बायुमास ओभलमा सुरु हुनेछ ।

प्रतियोगितामा समूह ए मा नेपाल, बहरान, भुटान, मलेसिया, कतार र युएई छन् । समूह बी मा चीन, हङकङ, थाईल्यान्ड, कुवेत र म्यानमार छन् । प्रतियोगितामा हरेक समूहका शीर्ष दुई टोलीले सेमिफाइनलमा स्थान बनाउनेछन् । फाइनलमा पुग्ने दुई टोलीले २०२४ मा हुने ग्लोबल टि२० क्वालिफायर खेल्न पाउनेछन् ।

नेपाल घरेलु टोली मलेसियालाई हराउँदै विश्वकप छनोटमा सानदार विजयी सुरुवात गर्न चाहन्छ । अघिल्लो साता नेपाल चार देश सम्मिलित महिला टि२० आई सिरिजमा मलेसियासँग ६ विकेटले पराजित भएको थियो ।

पहिला ब्याटिङको निम्तो पाएको नेपालले १८ ओभरमा ७ विकेट गुमाउँदै ८३ रन बनाएको थियो । उक्त रनको लक्ष्य मलेसियाले १६.२ ओभरमा ४ विकेट गुमाउँदै पूरा गरेको थियो ।

नेपालले पावर प्लेमा कमजोर प्रदर्शन गर्दै आएको छ । ब्याटिङक्रम भद्रगोल देखिएको थियो । कप्तान रुविना क्षेत्री बेलबासे, उपकप्तान इन्दु बर्मा र अनुभवी अलराउन्डर सीता रानामगर टोलीका प्रमुख खेलाडी हुन् ।

यी तीन खेलाडीको प्रदर्शनमा नेपालको नतिजा निर्भर रहनेछ । यी तीन ब्याटरबाट नेपाली टोली उत्कृष्ट प्रदर्शन चाहन्छ । सम्झना खड्का र पुजा महतोबाट पनि नेपालले अपेक्षा गर्नेछ । डेब्यू सिरिजमा युवा लेगस्पिनर खुशी डंगोलले पनि राम्रो प्रभाव छाडेकी छिन् ।

तीव्र गतिकी बलर कविता कुँवर र अश्मिना आचार्यको जोडी मलेसियालाई घातक बन्नसक्छ । उता मलेसियाकी ऐना हमिजाह हाशिम, वान जुलिया, मास एलिसा, महिरान इजाती इस्माल प्रमुख खेलाडी हुन् ।

नेपालको टोली :

रुविना क्षेत्री (कप्तान), सीता रानामगर, इन्दु बर्मा, विन्दु रावल, कविता कुँवर, कविता जोशी, पुजा महतो, सम्झना खड्का, ईश्वरी विष्ट, काजोल श्रेष्ठ, रुवी पोदार, अप्सरी बेगम, अश्मिना कर्माचार्य र खुशी डंगोल ।