काठमाडौं (हाम्रो खेलकुद) – कर्णाली प्रादेशिक क्रिकेट संघको अध्यक्षमा पदम बहादुर खड्का निर्विरोध रुपमा निर्वाचित भएका छन् । अध्यक्ष पदम खड्का बाहेक अन्य सबै पदमा निर्विरोध रुपमा कार्यसमिति चुनिएका छन् । कर्णालीको पहिलो साधरण सभाले कार्यसमिति बनाएको हो ।

यसअघि राष्ट्रिय प्रतियोगितामा कर्णालीले आफ्नै टोली बनाएपनि लुम्बिनी प्रदेशसँग जोडिएर काम गर्नु परेको थियो । तर कर्णालीका चार जिल्ला दैलेख, सल्यान, रुकुम र कालीकोटले सदस्यता मान्यता पाएपछि आफ्नै प्रदेश बनेको हो ।
उपाध्यक्षमा खड्ग जङ शाही, सचीवमा श्रीधर के.सी र कोषाअध्यक्षमा सुर्य थापा चुनिएका छन् ।

सदस्यहरुमा सबिन हमाल, बुलन्द बाबू सेजवाल, दमन राज शाही, कुल प्रसाद ओली, बाल कुमार नकाल, प्रकाश भुसाल, पवन कुमार थापा, समुन्द्र शाही र मनोज नेपाली चुनिएका छन् । नेपाल क्रिकेट संघ (क्यान) को केन्द्रिय चुनाव आगमी असोज पहिलो साता हुँदैछ । ४५ जिल्ला र ६ प्रदेशको चुनाव पनि सम्पन्न भएको छ । अव बागमती प्रादेशिक क्रिकेट संघको चुनाव हुन बाँकी छ । बागमती प्रदेशको चुनाव भदौ १५ माहुँदैछ । नेपालका सर्वाधिक सफल कप्तान पारस खड्का अध्यक्षमा बागमतीबाट लड्दै छन् ।

कोशी प्रादेशिक क्रिकेट संघमा सर्वजित पाण्डे, मधेश प्रादेशि संघको अध्यक्षमा सुनिल कुमार महासेठ, गण्डकी प्रादेशिक क्रिकेट संघमा सञ्जय कान्त सिंग्देल, लुम्बिनी प्रादेशिक संघको अध्यक्षमा सञ्जय गुरुङ, कर्णाली प्रादेशिक संघको अध्यक्षमा पदम खड्का र सुदूरपश्चिम प्रादेशिक क्रिकेट संघको अध्यक्षमा बासुदेव जोशीले जितेका थिए । क्यानको केन्द्रिय चुनावमा कुल ८६ भोट छ । अध्यक्ष जित्नको लागि ४४ भोट आवश्यक पर्दछ ।