एजेन्सी – अनुभवी ओपनर जोनी बेयरस्टो र ह्यारी ब्रुकको उत्कृष्ट ब्याटिङमा इंग्ल्यान्डले दोस्रो टि२० आई खेलमा न्युजिल्यान्डलाई ९५ रनले पराजित गरेको छ । योसँगै चार खेलको सिरिजमा इंग्ल्यान्ड २–० ले अघि छ ।

जितको लागि १ सय ९९ रनको विशाल विजयी लक्ष्य पछ्याएको न्युजिल्यान्ड १३.५ ओभरमा १ सय ३ रनमा अल आउट भयो । न्युजिल्यान्डका टिम सिफर्टले ३१ बलमा ४ चौकासहित सर्वाधिक ३९, ग्लेन फिलिप्स २२ र मार्क च्यापम्यान १५ रनमा आउट भए । अन्य न्युजिल्यान्डका कुनैपनि ब्याटरले दोहोरो अंकमा रन बनाउन सकेनन् ।

इंग्ल्यान्डका लागि डेब्यू खेल खेलेका युवा तीव्र गतिका बलर गस एटिकिन्सनले २.५ ओभरमा २० रन खर्चेर ४ विकेट लिए । आदिल राशिदले ३ ओभरमा १८ रन खर्चेर २ विकेट लिए । साम करन, बायडन केस, लियाम लिभिङस्टोन र विल ज्याक्सले एक एक विकेट लिए ।

त्यसअघि म्यानचेस्टरमा टस जितेर पहिला ब्याटिङ रोजेको इंग्ल्यान्डले निर्धारित २० ओभरमा ४ विकेट गुमाउँदै १ सय ९८ रन बनाएको थियो । इंग्ल्यान्डका जोनी बेयरस्टोले ६० बलमा ८ चौका र ४ छक्कासहित ८६ रनको योगदान दिए । विल ज्याक्स १९, डेविड मलान डक र मोईन अली ६ रनमा आउट भए । जस बटलर ८ बलमा १ छक्कासहित १३ रनमा नट आउट रहे ।

युवा ब्याटर ह्यारी ब्रुक ३६ बलमा ५ चौका र ५ छक्कासहित ६७ रनमा आउट भए । न्युजिल्यान्डका ईश सोधीले ४ ओभरमा ४४ रन खर्चेर २ विकेट लिए । टिम साउथी र मिचेल सान्टनारले एक एक विकेट लिए । पहिलो खेलमा इंग्ल्यान्ड ७ विकेटले विजयी भएको थियो । तेस्रो खेल आइतबार र चौथो खेल मंगलबार हुनेछ ।