काठमाडौं (हाम्रो खेलकुद) – नेपालले एसिया कपमा आज भारतसँग खेल्दैछ । खेल नेपाली समय अनुसार दिउँसो ३ : १५ मा श्रीलंकाको पालेकेले इन्टरनेशल क्रिकेट स्टेडियममा सुरु हुनेछ । नेपालले पहिलो पटक भारतसँग खेल्दैछ ।

पहिलो खेलमा पाकिस्तानविरुद्ध वर्तमान समयकै विश्वको उत्कृष्ट तीव्र गतिको बलिङ आक्रामणको सामना गरेको नेपाल भारतविरुद्ध आफ्नो उत्कृष्ट क्रिकेट खेल्न चाहन्छ । नेपाल र भारतबीचको खेलमा प्रभाव पार्न सक्ने दुबै टोलीका प्रमुख दुई खेलाडी यस प्रकार छन् ।

१.विराट कोहली (भारत)

विराट कोहली वर्तमान समयका विश्व क्रिकेटका एक सर्वोत्कृष्ट ब्याटर हुन् । कोहलीको क्षमता र प्रदर्शनको जति तारिफ गर्दा पनि कम हुन्छ । नेपाली खेलाडी कोहलीको खेलबाट धेरै कुराहरु सिक्नेछन् । कोहली एक्लै नेपालविरुद्ध विशाल योगफल बनाउन सक्छन् ।

विश्व क्रिकेटमा लगातार सानदार प्रदर्शन गर्दै आएका कोहली नेपालविरुद्ध हाबी हुनसक्ने खेलाडीमा पर्दछन् । पहिलो खेलमा पाकिस्तानसँग चार रनमा आउट भएका कोहलीलाई ठूलो प्रदर्शनका दबाब हुनेछ ।

कोहलीले २ सय ७६ ओडिआईमा ४६ शतक र ६५ अर्धशतकसहित कुल १२ हजार ९ सय २ रन बनाएका छन् । टेस्टमा कोहलीले २९ शतकसहित कुल ८ हजार ६ सय ७६ रन बनाएका छन् । कोहलीको विकेट हरेक नेपाली बलरलाई ड्रिम हुनेछ ।

सोमपाल कामी (नेपाल)

अलराउन्डर सोमपाल कामी खेलमा प्रभाव जमाउन सक्ने खेलाडी हुन् । सोमपाल नेपालका प्रमुख बलर हुन् । नयाँ बलका साथ सोमपालले राम्रो बलिङ गर्नसक्छन् ।

सोमपाल ब्याटिङ पनि राम्रो गर्ने क्षमता राख्छन् । पाकिस्तानको बलिङ आक्रामण सामु सोमपालले २८ रनको महत्वपूर्ण इनिङ खेलेका थिए । सोमपाल तीव्र गतिको बलिङ राम्रो खेल्ने गर्दछन् । आजको खेलमा राम्रो प्रभाव जमाउन सक्छन् ।

मोहम्मद शिराज(भारत)

भारतका तीव्र गतिका बलर मोहम्मद शिराज नेपालविरुद्ध हाबी हुनसक्छन् । शिराज स्वींग र गतिका लागि चिनिन्छन् । उनले भारतीय क्रिकेट टोलीबाट लगातार राम्रो प्रदर्शन गर्दै आएका छन् ।

शिराजले २५ ओडिआईमा ४३ विकेट लिएका छन् । पछिल्लो समय शिराजले लगातार राम्रो प्रदर्शन पनि गर्दै आएका छन् ।

सन्दीप लामिछाने (नेपाल)

सन्दीप लामिछाने नेपालका प्रमुख बलर हुन् । लेगस्पिनर सन्दीप लामिछानेले इन्डियन प्रिमियर लिग (आइपिएल) देखी विश्वका सबै चर्चित विदेशी लिग खेलेका छन् । सन्दीपले सन् २०१८ देखी २०२१ सम्म आइपिएल खेल्दा भारतीय सबै खेलाडीविरुद्ध खेलेको अनुभव छ ।

ओडिआई क्रिकेटमा सर्वाधिक छिटो ४२ खेलमा एक सय विकेट लिने विश्व कीर्तिमान बनाएका सन्दीपबाट नेपालले ठूलो अपेक्षा गर्नेछ । जादुमयी नतिजा हात पार्न सन्दीपले उत्कृष्ट क्रिकेट खेल्नुपर्ने हुन्छ ।

सन्दीपले ५० ओडिआई खेलमा १ सय १२ विकेट लिएका छन् । भारतलाई स्तब्ध पार्न सन्दीपको उत्कृष्ट प्रदर्शन विना सम्भव कम देखिन्छ ।