एजेन्सी – वेस्टइन्डिजका अलराउन्डर रहकीम कर्नवालले आफ्नो छोरालाई जन्मदिनमा उपहार विष्फोटक शतक दिएका छन् । बार्बाडोस रोयल्सबाट क्यारेवियन प्रिमियर लिगमा उनले सेन्ट किट्स एण्ड प्याट्रियटसविरुद्ध विष्फोटक शतक प्रहार गरेका हुन् । कर्नवालको शतकमा बार्बाडोसले ८ विकेटको एक यादगार जित हात पार्यो ।

जितको लागि २ सय २१ रनको विशाल विजयी लक्ष्य पछ्याएको बार्बाडोसले १८.१ ओभरमा २ विकेट गुमाउँदै पूरा गर्यो । बार्बाडोसको जितमा रहकीम कर्नवालले ४८ बलमा ४ चौका र १२ छक्कासहित १ सय २ रनको सानदार शतकीय इनिङ खेले ।

३० वर्षीय कर्नवालको यो टि२० करिअरको पहिलो शतक हो । वेस्टइन्डिजको टेस्ट टोलीमा नियमित खेल्दै आएपनि सिमित ओभरमा मौका पाउन सकेका छैनन् ।

कर्नवालले खेलपछि आफ्नो शतक छोराको जन्मदिनलाई समर्पित गर्ने बताएका छन् । ‘आज मेरो छोराको जन्मदिन हो । म यो प्रदर्शन उनलाई समर्पित गर्न चाहन्छु । मेरा दुई छोरा मलाई सधैं साथ दिनछन् । पिच साँच्चै राम्रो थियो र मैले आफैंलाई समर्थन गरे’, खेलपछि कर्नवालले भनेका छन् ।

हेभिवेट भएपनि उनले क्रिकेटमा राम्रो प्रदर्शन गर्दै आएका छन् । फिटनेशको लागि शारीरिक तौल भन्दा पनि आफू फिट हुनु पर्ने उदाहरण प्रस्तुत गर्दै आएका छन् । वेस्टइन्डिजबाट १० टेस्ट खेलमा दुई अर्धशतकसति २ सय ६१ रन बनाउनुको साथै ३५ विकेट लिएका छन् । कर्नवाल स्पिन बलिङ राम्रो गर्ने गर्दछन् । यस खेलमा उनले बलिङमा दुई विकेट लिएका थिए ।

त्यस्तै बार्बाडोसको जितमा कप्तान रोभम्यान पावेल २६ बलमा ५ चौका र ३ छक्कासहित ४९ रनमा नट आउट रहे । कायल मेयर्स २२, लौरी इभान्स २४ र एलिक एथान्जे १३ रनमा नट आउट रहे ।

त्यसअघि टस जितेर पहिला ब्याटिङ रोजेको सेन्ट नर्भिसले निर्धारित २० ओभरमा ४ विकेट गुमाउँदै २ सय २० रनको योगदान दिए । कप्तान शेर्फान रदरफोर्डले २७ बलमा ५ चौका र ५ छक्कासहित सर्वाधिक ६५ रनको योगदान दिए । विल स्मीडले ३६ बलमा ५ चौका र ४ छक्कासहित ६३, आन्द्रे फेल्चरले ५६ रन बनाए ।

बार्बाडोसका रहकीम कर्नवालले ३ ओभरमा २७ रन खर्चेर २ विकेट लिए । सिपिएलमा सेन्ट लुसिया किंग्स ६ खेलमा ८ अंकका साथ शीर्षथानमा छ । गुयाना एमोजन ४ खेलमा ७ अंकका साथ दोस्रो स्थानमा छ ।