काठमाडौं (हाम्रो खेलकुद) – नेपाल आफ्नो ओडिआई क्रिकेट इतिहासमा पहिलो पटक १० विकेटले पराजित हुन पुगेको छ । एसिया कपमा सोमबार राती भारतसँग १० विकेटको हार ओडिआईमा नेपालले विकेटको हिसाबमा ब्यहोरेको सबैभन्दा ठूलो हार हो ।

जितको लागि १ सय ४५ रनको विजयी लक्ष्य पछ्याएको भारतले २०.१ ओभरमा कुनै विकेट नगुमाई पूरा गर्यो । भारतको जितमा रोहित शर्मा ५९ बलमा ६ चौका र ५ छक्कासहित ७४ रनमा अविजित रहे । शुभमन गिल ६२ बलमा ८ चौका र १ छक्कासहित ६७ रनमा अविजित रहे ।

नेपालले यसअघि ओडिआईमा विकेटको हिसाबमा सबैभन्दा ठूलो हार ८ विकेटको ब्यहोरेको थियो । आइसिसी विश्वकप लिग २ मा २०२० मा ओमान, २०२२ मा स्कटल्यान्ड र दुई महिना अघि आइसिसी विश्वकप छनोटमा जिम्बावेसँग नेपाल समान ८ विकेटले पराजित भएको थियो ।

नेपालका करण केसीले ४ ओभरमा २६, सोमपाल कामीले २ ओभरमा २३, ललितनारायण राजवंशीले ४ ओभरमा २४, सन्दीप लामिछानेले ४ ओभरमा ३९, दीपेन्द्रसिंह ऐरीले २ ओभरमा १२, कुशल मल्लले ३ ओभरमा ११ र गुलशन झाले १.१ ओभरमा ११ रन खर्चिएका थिए ।

नेपाल पाकिस्तानसँग २ सय ३८ रनले पराजित भएको थियो । त्यो ओडिआईमा नेपालले ब्यहोरेको सबैभन्दा ठूलो रन अन्तरको हार थियो । त्यसअघि विश्वकप छनोटमा जिम्बावेविरुद्ध नेपाल १ सय १ रनले पराजित भएको थियो ।

नेपालले २०१८ मा ओडिआई मान्यता पाएको थियो । नेपालले हालसम्म ५९ ओडिआई खेल खेल्दा ३० मा जित, २७ मा हार, १ मा टाई र १ खेल रद्द हुन पुगेको छ ।