काठमाडौं(हाम्रो खेलकुद) – भारतीय तथा विश्व क्रिकेटका एक उत्कृष्ट ब्याटर विराट कोहली, मुख्य प्रशिक्षक राहुल द्रविड र हार्दिक पान्ड्याले नेपाली खेलाडीलाई ह्याप्पी ड्रेसिङ रुमको अवार्ड दिएका छन् । भारतसँगको खेलपछि नेपालले उत्कृष्ट प्रदर्शन गर्ने तीन नेपाली खेलाडी आसिफ शेख, दीपेन्द्रसिंह ऐरी र सोमपाल कामीलाई उक्त अवार्ड दिएको हो ।

भारतविरुद्ध ९७ बलमा ८ चौकासहित सर्वाधिक ५८ रन बनाएका ओपनर आसिफ शेखलाई विराट कोहलीले उक्त अवार्ड दिएका थिए । कोहलीले एक्स्टा कभरमा एक रनमा आसिफको क्याच छाड्दै जीवनदान दिएका थिए । मोहम्मद शिराजको बलमा आसिफ कोहलीबाटै आउट भएका थिए ।

तल्लोक्रममा ५६ बलमा १ चौका र २ छक्कासहित ४८ रन बनाएका सोमपाल कामीलाई हार्दिक पान्ड्याले अवार्ड दिएका थिए । त्यस्तै २५ बलमा ३ चौकासहित २८ रन जोडेका दीपेन्द्रसिंह ऐरीलाई राहुल द्रविडले अवार्ड दिएका थिए । भारतकै ड्रेसिङ रुपमा गएर मोन्टीले नेपाली खेलाडीलाई उक्त अवार्ड दिन लगाएका थिए ।

मोन्टी देशाई गत माघमा नेपालको मुख्य प्रशिक्षक बनेर आएपछि ह्याप्पी ड्रेसिङ रुम ट्याग चालाउँदै आएका छन् । ह्याप्पी ड्रेसिङ रुममा राम्रो खेल्ने खेलाडीलाई अवार्ड दिइने गरिन्छ । खेल मात्रै होईन मैदान बाहिर रहेर योगदान दिने खेलाडीले पनि यस अवार्ड पाउने गर्दछन् ।