एजेन्सी – विकेटकिपर कुशल मेन्डिसको उत्कृष्ट ब्याटिङमा श्रीलंकाले एसिया कपमा अफगानिस्तानलाई २ सय ९२ रनको बलियो लक्ष्य दिएको छ । गद्दाफी स्टेडियम लाहोरमा टस जितेर पहिला ब्याटिङ रोजेको श्रीलंकाले निर्धारित ५० ओभरमा ८ विकेट गुमाउँदै २ सय ९१ रन बनायो ।

सुपर फोरमा पुग्न अफगानिस्तानले यस लक्ष्य ३७.१ ओभरमा पूरा गर्नु पर्ने हुन्छ । अन्यथा जितका बाबजुद अफगानिस्तान बाहिरिनेछ । समूह ए बाट पाकिस्तान र भारत सुपर फोरमा पुगेका छन् । समूह बी बाट बंगलादेश पुगि सकेको छ ।

अव श्रीलंका र अफगानिस्तान मध्य एक पुग्नेछन् । श्रीलंका विजयी वा ३७.१ ओभर पछि पराजित हुँदा पनि सुपर फोरमा पुग्नेछ ।
विकेटकिपर कुशल मेन्डिस ८४ बलमा ६ चौका र ३ छक्कासहित ९२ रनमा रन आउट भए ।

उनी राशिद खानको बलमा रन आउट भएपछि शतकको अवसर गुमाएका थिए । ओपनर पाथुम निसांका र दीमुथ करुणारत्नेले पहिलो विकेटका लागि १०.२ ओभरमा ६३ रनको साझेदारी गरेका थिए ।

निसांका ४० बलमा ६ चौकासहित ४१ रनमा आउट ए । दिमुथ ३५ बलमा ६ चौकासहित ३२, सदिरा समाराविक्रामा ३, चरिथ असलंका ३६ र दासुन शानका ५ रनमा आउट भए ।

दुनिथ वेलालागे ३९ बलमा ३ चौका र १ छक्कासहित ३३ रनमा नट आउट रहे । अन्तिम बलमा आउट भएका महेश थिक्सेना २४ बलमा २ चौका र १ छक्कासहित २८ रनमा आउट भए । आठौं विकेटका लागि थिक्सेना र वेलालागेले ६३ बलमा ६४ रनको महत्वपूर्ण साझेदारी गरेका थिए ।

गुलबदीन नाइबले १० ओभरमा ६० रन खर्चेर ४ विकेट लिए । राशिद खानले १० ओभरमा ६३ रन खर्चेर २ विकेट लिए । मुजिब उर रहमानले १० ओभरमा ६० रन खर्चेर १ विकेट लिए ।