काठमाडौं (हाम्रो खेलकुद) – भारतीय क्रिकेट टोलीका ब्याटर विराट कोहलीले नेपालका आसिफ शेखलाई मेडल लगाउँदा जिस्काउँदै एउटा आफूलाई पनि दिन भनेको बताएका छन् ।

नेपाल फर्किएपछि विकेटकिपर आसिफ शेखले उक्त कुरा जानकारी दिएका हुन् । ह्याप्पी ड्रेसिङ रुम अन्तर्गत भारतको ड्रेसिङ रुपमा नेपाल खेलाडी गएका थिए । भारतीय खेलाडी विराट कोहलीले आसिफ शेखलाई मेडल लगाइदिएका थिए ।

कोहलीले लगाइदिने बेला आसिफलाई केहि भन्दै जिस्काएका थिए । पछाडि बसेका सूर्यकुमार यादव पनि उक्त कुरा सुनेर हाँसेका थिए । नेपाल फर्किएपछि आसिफले उक्त प्रंसग बारे बताएका छन् । ‘कोहलीले मेडल लगाइदिदा एउटा क्याच मैले पछि छाडेको छु । विराट कोहलीले मेडल लगाइदिदा मलाई गर्व महसुस भयो । अन्तिममा वहाँले के भन्नु भयो भने एउटा मेडल मलाई पनि दिनु । मैले क्याच छाडेको छु’, आसिफले भने ।

आसिफलाई कोहलीले ब्यक्तिगत एक रनमा एक्स्ट्रा कभरमा जीवनदान दिएका थिए । मुख्य प्रशिक्षक मोन्टी देशाईको पहलमा नेपाली टोली भारतीय ड्रेसिङ रुममा पुगेको थियो । नेपाली खेलाडीले भारतीय स्टारसँग कुराकानी गर्नुको साथै अटोग्राफ समेत लिएका थिए ।

भारतविरुद्ध ९७ बलमा ८ चौकासहित सर्वाधिक ५८ रन बनाएका ओपनर आसिफ शेखलाई विराट कोहलीले उक्त अवार्ड दिएका थिए । मोहम्मद शिराजको बलमा आसिफ कोहलीबाटै आउट भएका थिए ।

तल्लोक्रममा ५६ बलमा १ चौका र २ छक्कासहित ४८ रन बनाएका सोमपाल कामीलाई हार्दिक पान्ड्याले अवार्ड दिएका थिए । त्यस्तै २५ बलमा ३ चौकासहित २८ रन जोडेका दीपेन्द्रसिंह ऐरीलाई राहुल द्रविडले अवार्ड दिएका थिए ।

एसिया कप खेलेर नेपाली टोली दिउँसो १ बजे नेपाल आइपुगेको थियो । मोन्टी भने नेपाल आएका छैनन् । नेपाल एपिएफ क्लबको ब्यान्ड बाजाले क्रिकेट टोलीलाई स्वागत गरेको थियो । नेपाल भारतसँग १० विकेट र पाकिस्तानसँग २ सय ३८ रनले पराजित हुँदै बाहिरिएको थियो ।