एजेन्सी – युवा विकेटकिपर ब्याटर निकोलस पुरनले त्रिबांगो नाइट राइडर्सबाट क्यारेवियन प्रिमियर लिगमा बार्बाडोस रोयल्समाथि उत्कृष्ट शतक हानेका छन् । उनको शतकको सहयोगमा नाइट राइडर्स ४२ रनले विजयी हुँदै अंक तालिकामा दोस्रो स्थानमा उक्लिएकोछ ।

क्विन्स पार्क ओभलमा टस हारेर पहिला ब्याटिङको निम्तो पाएको नाइट राइडर्सले निर्धारित २० ओभरमा ६ विकेट गुमाउँदै २ सय ८ रन बनायो । निकोलस पुरन ५३ बलमा ५ चौका र १० छक्कासहित १ सय २ रनमा नटआउट रहे ।

आन्द्रे रसेल २२ बलमा २ चौका र ४ छक्कासहित ३९ रनमा आउट भए । ओपनर मार्टिन गुप्टिल ३७, मार्क दयाल ६, काइरन पोलार्ड २ र लोर्कान टकर ८ रनमा आउट भए । रोयल्सका ओबेद म्याककोयले ४ ओभरमा ३९ रन खर्चेर २ विकेट लिए । कायल मेयर्स, क्वाइस अहमद र रहकीम कर्नवालले एक एक विकेट लिए ।

जितको लागि २ सय ९ रनको विशाल विजयी लक्ष्य पछ्याएको रोयल्सले निर्धारित २० ओभरमा ७ विकेट गुमाउँदै १ सय ६६ रन बनायो । ओपनर कायल मेयर्सले ४५ बलमा ७ चौका र ४ छक्कासहित सर्वाधिक ७० रनको योगदान दिए । अन्य ब्याटरले राम्रो प्रदर्शन गर्न सकेनन् ।

नाइट्सका अकिल हुसैनले ३ ओभरमा २१ रन खर्चेर २ विकेट लिए । वकार कलाम्खेलले ४ ओभरमा १८ रन खर्चेर २ विकेट लिए । सुनिल नारायण, आन्द्रे रसेल र अली खानले एक एक विकेट लिए ।