default_image

10 months ago

September 9, 2023

नेपाली महिला क्रिकेटको दुर्गति : जिम्मेवार को ?

6146 views

0 Bookmark

भुपेन्द्र जि.सी.काठमाडौं

आइसिसी महिला टि२० विश्वकप एसिया क्षेत्र छनोटमा नेपाल सेमिफाइनल खेलमा थाइल्यान्डसँग पराजित हुँदै बाहिरियो । पहिलो पटक ग्लोबल टि२० छनोट हुँदै विश्वकप खेल्ने नेपाली चेलीको सपना फेरि अधुरै रह्यो । नेपाल सेमिफाइनल सम्म पुगेपनि र त्यसअघि चार देश सम्मिलित महिला टि२० आई सिरिजको उपाधि नेपालले जितेपनि खुशी भन्दा बढी निराशा थियो । त्यसको मुख्य कारण खराब ब्याटिङ थियो ।

विश्वकप छनोटमा मलेसियालाई पाँच रन, बहराइनलाई १० विकेट, भुटानलाई ३ विकेट, कतारलाई ९ विकेट र युएईसँग वर्षाको कारण खेल रद्द भयो । युएईसँग खेल रद्द हुनु नेपालको लागि दुर्भाग्य थियो । उक्त खेल भएको भए सेमिफाइनलमा समीकरण सायद अर्कै र नेपालको विश्वकप छनोट यात्रा सहज हुन सक्थ्यो । नेपालले विश्वकप छनोट र सिरिजमा गरि कुनैपनि खेलमा ब्याटिङमा १ सय रन कटाउन सकेन ।

कुनैपनि ब्याटरले विश्वकप छनोटमा ७० रन कटाउन सकेनन् । सीता रानामगर एकमात्रै खेलाडी हुन् जसले ५० माथि रन बनाइन् । सीताले ५ खेलमा सर्वाधिक ६९, तीव्र गतिकी बलर कविता कुँवर ३४, काजोल श्रेष्ठ ३२, अप्सरी बेगम २७, कप्तान रुविना क्षेत्री बेलबासे र कविता जोशीले समान २४ तथा इन्दु बर्मा २३ र पुजा महतोले १२ रन बनाए ।

१० माथि अन्य खेलाडीले रन बनाउन सकेनन् । एक खेलमा बनाउनु पर्ने रन नेपाली ब्याटरले पुरा प्रतियोगिता खेल्दा बनाउन सकेनन् ।

बलिङतर्फ इन्दु बर्मा र पुजाले ६-६ विकेट लिए । कविता कुँवर ५, खुशी, कविता जोशी र रुविनाले ३-३ विकेट लिए । भुटानले दिएको ४० रनको झिनो लक्ष्य पूरा गर्न नेपालले ७ विकेट गुमाउनु पर्यो । सीताले पहिलो खेलमा मलेसियाविरुद्ध बनाएको ३८ रन नै एकै खेलमा नेपाली ब्याटरको उच्च रन रह्यो ।

सन् २००७ को पहिलो महिला अन्तर्राष्ट्रिय सहभागितामै नेपाल फाइनल पुग्दै बंगलादेशसँग हार्न पुगेको थियो । त्यो समय नेपाली महिला टोलीले पुरुषले भन्दा छिटो विश्वकप खेल्ने अनुमान गरिएको थियो । महिला क्रिकेट एकपछि अर्को गरि खस्किएको छ । एक समय नेपालले सहजै हराउने थाइल्यान्डले २०२० को विश्वकप खेल्दै विश्व क्रिकेटमा सानदार प्रदर्शन गर्दै आएको छ । नेपाल र थाइल्यान्डको स्तर अव तुलना गर्न मिल्दैन । नेपालका ती जित एकादेशका कथा जस्तै बनेका छन् ।

पछिल्लो समय त नेपाल मलेसिया, युएई र हङकङ हार्दै आएको छ । ब्याटिङ साह्रै दयनीय देखिएको छ । अव नेपालले भुटानसँग जित निकाल्न ठूलो संघर्ष गर्न थालेको छ । महिला क्रिकेट विकास होइन दुर्गति बढ्दो छ । क्यानको कमजोर लगानी, भद्रगोल ब्याटिङ लाइनअप, खराब कप्तानी, प्रशिक्षण, टिम म्यानेजमेन्ट, खेलाडी छनोटमा गल्ती र खेलाडीहरूले जिम्मेवारी नलिनु नेपाली महिला क्रिकेट खस्किनुको प्रमुख कारण हुन् ।

लगातार परिवर्तन ब्याटिङ लाइनअप

विश्वका सबै सफल टोली र विश्वकप विजेताहरू टोली हेर्ने हो भने ब्याटिङक्रम लामो समय देखी एकै हुन्छ । नेपालले ओपनर विन्दुलाई नवौँ नम्बरमा खेलाउने मुर्खता गर्यो । नवौँ नम्बरमा सामान्यतया बलर वा अलराउन्डर खेल्ने गर्दछन् । जसले छोटो र तर आक्रामक रुपमा रन जोड्न सकोस् ।

विन्दुको खेल्ने शैली ओपनर हो । नेपालबाट २३ महिला टि२० आई खेलमा ३ सय १८ बल खेल्दा २ सय १ रन बनाएकी छिन् । स्ट्राइक रेट ६३.०२ छ । यदि उनलाई टोलीमा खेलाउनु थियो भने ओपनरको रुपमा खेलाउनु पर्दथ्यो ।

बायाँ हाते ब्याटर हुँदा केहि समय लिएपछि अन्त्यतिर आक्रामक रन जोडन सक्थिन् । ओपनरलाई नवौँ वा तल्लोक्रममा खेलाएपछि प्रदर्शन नहुनुमा उनको गल्ती छैन ।

काजोल श्रेष्ठको टोलीमा पर्दा लगातार आलोचित हुँदै आएकी छिन् । उनले पाएको अवसरलाई न्याय पनि गर्न सकेकी छैनिन् । उनले खेलेका ब्याटिङ गरेका चार मध्य तीन इनिङमा शून्यमा आउट भएकी छिन् । तुलनात्मक रुपमा निकै कमजोर कतारविरुद्ध ३२ रन बनाएकी थिइन् ।

सीता घरेलु क्रिकेटमा पनि निरन्तर ओपनिङ गर्दै आएकी छिन् । नेपाली टोलीकी त उनी सर्वाधिक सफल खेलाडी हुन् । पहिलो पुस्ताकी खेलाडी भएकी सितालाई नेपालले हङकङसँग छैटौं, कुवेत र मलेसियासँग चौथो नम्बरमा खेलाएको थियो । विश्वकप छनोटमा मलेसियालाई हराउन ओपिनङ गर्दै प्लेयर अफ द म्याच जितेकी थिइन् ।

पुजा महतोलाई नेपालले ओपनिङ हुँदै मध्यक्रम र तेस्रो नम्बरमा खेलायो । यी दुबै भूमिकामा सफल हुन नसकेपछि तल्लोक्रममा खेलाउनु पर्यो । तेस्रो नम्बरकी ब्याटर इन्दु बर्माको स्थान पनि पक्का रहेन । त्यस्तै उदीयमान युवा ब्याटर सम्झना खड्का, कप्तान रुविना क्षेत्री बेलबासे लगायत कुनैपनि ब्याटरको स्थान रहेन ।

अलराउन्डर अप्सरी बेगम राम्रो क्षमता भएकी खेलाडी हुन् । लगातार टोलीमा परे पनि उनको भूमिका के हो उनैलाई थाहा छैन । खेलाडीले आफ्नो भूमिका नै थाहा पाउन सकेनन् । खेल अनुसार परिवर्तन हुने हुँदा खेलाडी नै अलमलमा परे ।

ब्याटिङक्रम अनुसार खेलाडीले योजना बनाएर खेल्नुपर्ने हुन्छ । खेलाडीहरुले त्यो योजना बनाउन नपाउँदा रन बनाउन सकेनन् ।विश्वकप छनोट जस्तो प्रतियोगितामा नेपालले गल्ली क्रिकेटमा जसरी ब्याटिङक्रम पठायो ।

वास्तवमा विश्वकप छनोटमा जुन ब्याटिङ क्रम खेलाउनु थियो त्यसैमा सिरिजमा खेलाएको भए नतिजा अर्कै थियो । हाम्रो लक्ष्य सिरिज नभएर ग्लोबल छनोट थियो । भद्रगोल ब्याटिङ क्रमको जिम्मेवार ब्याटर भन्दा पनि कप्तान, प्रशिक्षक र टिम म्यानेजमेन्ट लिनुपर्छ ।

टिम छनोटमा गल्ती

नेपालले अगष्ट १० मा मलेसिया जाने अन्तिम टोली राती सार्वजनिक गरेको थियो । टियुमा अर्कोदिन बिहानै अन्तिम १४ सदस्य प्रशिक्षण गर्दा नपर्नेले मुख्य प्रशिक्षक दीपेन्द्र चौधरीसँग जवाफ खोजेका थिए । त्यो अधिकार हरेक खेलाडीहरूसँग हुन्छ । दीपेन्द्रले त्यसको जवाफ दिनपनि सक्नुपर्छ ।

पछिल्ला तीन वर्ष घरेलु क्रिकेटमा हेर्ने हो भने ओपनर तथा विकेटकिपर ज्योति पाण्डे सर्वाधिक सफल ब्याटर मध्यकी एक हुन् । शीर्ष तीनमा उनी सधैँ पर्छिन् । विकेटकिपरमा त उनी धेरै अघि छन् । तर उनलाई छनौटकर्ताले विकेटकिपर कारण बाहिर राखे । प्रशिक्षणमा किपिङमा रुवि पोदार शीर्ष र काजोल दोस्रो नम्बरमा परेको जवाफ पाइन् । ज्योति तेस्रो र कन्चन श्रेष्ठ चौथो नम्बरमा परे ।

छनोटकर्ताले रन भन्दा पनि किपिङ हेरेको जवाफ दिए । तर शीर्ष नम्बरकी रुवि पोदारलाई नेपालले भुटानसँग मात्रै डेब्यू दियो । त्यसमा पनि ७ विकेट जादासम्म उनले ब्याटिङ पाइनन् । सिरिजमा एक खेल पनि अवसर रुवीले पाइनन् ।

रुवी पोदार

गम्भीर प्रश्न कहाँ छ भने यदि किपिङ मात्रै हेरेको भए रुविले किन सबै खेलमा खेल्ने मौका पाइनन् ? किपरबाट नेपाललाई रनको त आवश्यक थिएन । किपर मात्रै चाहिएको थियो ।

काजोल असफल हुँदा पनि रुविलाई मौका नदिनुले ज्योतिलाई बाहिर राख्ने बाहना मात्रै भएको स्पष्ट बुझिन्छ । त्यसको घाटा ट टोलीलाई नै लाग्यो ।

नेपाल एपिएफ क्लबबाट खेल्दै आएकी राजमती ऐरी घरेलु क्रिकेटमा ठूलो सम्भावना बोकेकी अलराउन्डर हुन् । उनलाई विकास गर्ने हो भने बिग म्याच विनर अलराउन्डर बन्न सक्ने खुबी छ । उनी शीर्षक्रम ब्याटिङसँगै तीव्र गतिमा बलिङ गर्ने गर्दछिन् । घरेलु क्रिकेटमा पनि प्रदर्शन राम्रो छ । तर उनी २४ जनाको प्रशिक्षणमा पनि परिनन् ।

अलराउन्डर पुजा महतो एउटा पनि घरेलु क्रिकेट नखेली सिधैं नेपाली टोलीमा परिन् । सिधै नेपाली टोलीमा मौका दिँदा उनले ब्याटिङमा राम्रो गर्न सकिनन् ।

पुजा महतो

बलिङ भन्दा पनि उनलाई नेपालले ब्याटिङ अलराउन्डरको रुपमा मौका दिएको दाबी गरेको थियो । तर उनी ओपनर, मध्यक्रम दुवैमा चल्न नसकेपछि तल्लोक्रममा खेल्नुपर्यो । तर दाबी गरेअनुसार प्रदर्शन देखाउन सकिनन् ।

टोलीमा नपरेका खेलाडीहरू पुजाको क्यानमा मान्छे हुँदा परेको आरोप समेत लगाएका थिए । उता चोटबाट पुनरागमन गर्ने तयारीमा रहेकी करुणा भण्डारीलाई भने क्यानले घरेलु क्रिकेट खेल्नु पर्ने जवाफ पाएको बुझिएको छ ।

ठूला प्रतियोगितामा अनुभवी खेलाडीको महत्व सधैँ हुन्छ । प्रदर्शन भन्दा अनुभव अघि हुन्छ । अनुभवी अलराउन्डर नेरी थापा पछिल्ला दुई घरेलु क्रिकेट प्रतियोगिता प्रदर्शन अनुसार सिनियर टोलीमा पर्ने दाबेदार थिइन् । तर उनलाई सीतासँग भूमिका तुलना गर्दै बाहिर राख्यो । त्यसैको कारण सीतालाई सिरिजमा नेपालले तल्लोक्रममा खेलाउने एउटा बाहना पनि देखाएको थियो ।

घरेलु क्रिकेट पनि ६ महिना अघि भएको हुँदा प्रदर्शन नहेर्ने सम्म जवाफ पाएको बताएकी थिइन् । घरेलु प्रतियोगिता अन्तिम पटक ६ महिना अघिनै भएको थियो । खेलाडीले नयाँ प्रदर्शन देखाउन घरेलु क्रिकेट पनि त हुन पर्यो ।

रोमा थापा नेपाली एक उत्कृष्ट युवा ब्याटर र फिल्डर हुन् । मध्यक्रममा उनी भरपर्दो ब्याटर बन्न सक्थिन् । तर उनी टोलीमा परिनन् । उनी टोलीमा नपर्नु कुनै कारण थिएन । अनुभव र प्रदर्शन दुबैको आधारमा पर्न सक्थिन् । तर कप्तान रुविनाले टोलीमा समेट्न चाहिनन् ।

त्यसको मुख्य कारण थियो उनी २०२१ मा कोशी प्रदेश छाड्दै एपिएफमा गएकी थिइन् । एपिएफ गएपछि उनले मौका पाउन सकेकी छैनन् । बरु टोलीले उनी भन्दा कमजोर प्रदर्शन गर्ने खेलाडीलाई मौका दिँदै आएको छ ।

यी मौका पाउन योग्यका केहि उदाहरण मात्रै हुन् ।

कप्तान र प्रशिक्षकमाथि प्रश्न

कुनैपनि टिम छनोट कप्तान, प्रशिक्षक र छनौटकर्ता बसेर गर्ने गरिन्छ । हरेक खेलाडीसँग आफू किन टोलीमा नपरेको सोध्ने अधिकार हुन्छ । जिम्मेवार ब्यक्तिले त्यसको जवाफ दिनु दायित्व हो । खेलाडीले जवाफ दिन बोलाउँदा कप्तान रुविना र मुख्य प्रशिक्षक स्यामसन जंग थापा पछि हटेका थिए । छनोटकर्ता दीपेन्द्र एक्लैले जवाफ दिनु परेको थियो ।

रुविनाले त्यसै दिन मिडियासँग आफूहरूलाई प्रशिक्षक र छनौटकर्ताले जस्तो टिम दियो त्यस्तै खेलाउने बताएकी थिइन् । भद्रगोल ब्याटिङ क्रम र टिम छनोट कप्तान र प्रशिक्षकले मिलाउनु पर्ने थियो । प्लेइङ ११ र ब्याटिङ क्रम उतार्न कप्तान र प्रशिक्षकको ठूलो हात हुन्छ । रुविनाले केहि खेलाडीलाई बढी फेबर र कसैले राम्रो गर्दा पनि मौका नदिएको आरोप समय समयमा लाग्ने गर्दछ ।

लगानी बिना प्रतिफलको आशा

नेपालले पहिलो पटक विदेशी प्रशिक्षकको रुपमा भारतीय देविका पाल्शिकरलाई नेपाल ल्यायो । उनी ब्याटिङ प्रशिक्षकको भूमिका निर्वाह गर्न आएकी थिइन् । ग्रासरुट देखिनै कमजोर ब्याटिङ सुधार गर्न एक महिना सम्भव थिएन । त्यसमा पनि वर्षायामको कारण इन्डोरमा मात्रै खेलाडीको प्रदर्शन हेर्नु पर्यो ।

पुरुष टोलीलाई जस्तै विश्वस्तरीय महिला प्रशिक्षक आवश्यक छ । क्यानलाई बजेट छैन भन्ने अव छुट छैन । आइसिसीको अनुदान मात्रै नभएर अव आफ्नै आर्थिक अवस्था सुधार गर्नुपर्छ । काम गर्न नसक्ने पदाधिकारी र कर्मचारीले नैतिकताको आधारमा छाड्नुपर्छ । अव बाहना बनाउने ठाउँ छैन ।

मेयर्स कप बाहेक अन्य प्रतियोगिता काठमाडौं बाहिर हुन्छ । काठमाडौं बाहिरको मैदान राष्ट्रिय प्रतियोगिता गर्न मिल्ने विरलै छन् । एक दुईवटा प्रदेश टोली र एपिएफ बाहेक अन्य टिमबीच प्रतिस्पर्धा हुँदैछ । घरेलु प्रतियोगितामा सीता, रुविना, ज्योति, नेरी लगायतका पहिलो पुस्ताका खेलाडीनै हाबी हुँदै आएका छन् ।

नयाँ खेलाडीले प्रदर्शन नै गर्न सकेका छैनन् । प्रमुख केही खेलाडी नहुने हो भने झनै बिजोक हुने देखिन्छ । किनभने उनीहरुलाई प्रतिस्थापन गर्ने खेलाडी तयार भएका छैनन् । त्यसैले सीता र रुविना जस्ता अनुभवी खेलाडी अझै लामो समय सम्म नेपाली टोलीमा खेल्न आवश्यक देखिन्छ । तयार नहुनु भनेको क्यानले काम नगर्नु हो । क्यानमा क्रिकेट विकास गर्ने सोच भएका निकै कम पदाधिकारी छन् ।

सामाजिक सञ्जालमा जय क्रिकेट भन्न भन्दापनि ग्रासरुट विकासमा ध्यान दिन आवश्यक छ । सफलतामा बधाई दिन भन्दा पनि सफलता दिलाउन सक्ने बनाउन आवश्यक छ ।

क्यानले महिला क्रिकेटमा लगानी गर्न कन्जुसाई गर्दै आएको छ । प्रतियोगिता एक महिना अघि मात्रै तयारी गर्ने गर्दछ । जुन तयारी पर्याप्त छैन ।

क्यानले ग्रेडिङ संख्या घटाएर २४, १८ हुँदै १२ पुर्याएको छ । एक वर्षभन्दा बढी नेपाली टोली अन्तर्राष्ट्रिय खेल विहीन बनेर बसेको थियो । महिला क्रिकेट विकास गर्न क्यानले लगातार अन्तर्राष्ट्रिय स्तरमा खेलको अनुभव दिनुपर्ने थियो ।

खेलाडीहरुले अवसर नबुभ्नु र जिम्मेवारी नलिनु

नेपाली महिला क्रिकेटमा अन्तर्राष्ट्रिय खेल दशै तिहार जस्तै हो । वर्षमा एकदुई वटा आउँछ । त्यसलाई सदुपयोग गर्न सक्नुपर्छ । खेलाडीहरूले आफ्नो सबै समस्या र कमजोरी भुलेर अवसर सदुपयोग गर्न सक्नुपर्छ । यस प्रतियोगिताबाट ग्लोबलमा पुग्न सकेको भए थप खेलहरु खेल्न पाउथेँ । त्यो अघि अभ्यास खेलहरू हुन्थे ।

क्रिकेट भनेको एक बल र ब्याटको खेल हो । विपक्ष र कुन खेलाडी भनेर हेरिँदैन । जहाँ मौका पाइन्छ त्यहाँ चौका हान्नुपर्छ । मौकामा चौका हान्नुको सट्टा डट खेलेपछि कुनैपनि ब्याटरले ठूलो इनिङ खेल्न सक्दैन ।

यस्ता अवसर सदुपयोग गर्न नसके थप अवसर पाउन कठिन हुन्छ । युवा खेलाडी भन्दा पनि प्रमुख खेलाडीले खेलमा अतिरिक्त जिम्मेवारी लिन आवश्यक देखिन्छ ।

विदेश पलायन बढ्दै

सुमन खतिवडा वर्तमान समयकी नेपाली क्रिकेटले पाएको सबैभन्दा उत्कृष्ट ब्याटिङ अलराउन्डर हुन् । उनको जस्तो आक्रामक ब्याटिङ शैली खुबी भएको खेलाडी विरलै छन् । तर लगातार मौका नपाएपछि उनले क्रिकेट छाडेर अष्ट्रेलिया जाने निर्णय लिएकी थिइन् ।

तर लगातार मौका नपाएपछि उनले क्रिकेट छाडेर अष्ट्रेलिया जाने निर्णय लिएकी थिइन् । राम्रो खेल्दा र गर्दा पनि मौका पाइदैन भने त्यो निराशा स्वभाविक थियो । सायद समुन जस्तो प्रतिभा पाउन नेपालले दश भन्दा बढी समय कुनुपर्छ ।

विस्फोटक ब्याटरको पहिचान बनाएकी डली भट्ट अष्ट्रेलिया पुगिसकेकी छिन् । खुलेर ठूला सट र छक्का प्रहार गर्न सक्ने खुबी भएका दुबै खेलाडीले क्रिकेट छाड्ने निर्णय लिए । त्यसको असर भुटानविरुद्ध ४० रन पछ्याउँदा ७ विकेट राम्रो उदाहरण हो ।

ब्याटिङमा आशा बोकेकी बागमतीकी विन्दा कटवाल जापान लागिसकेकी छिन् । केही ठूलो सम्भावना बोकेका खेलाडीहरू पनि जापान जाने तयारीमा छन् । लगातार खराब प्रदर्शन र राम्रो गर्दा मौका नपाउँदाको निराशाको कारण विदेश पलायन बढ्दैछ ।

अव के ?

क्यानले महिला क्रिकेटमा लगानी बढाउनुपर्छ ।

प्रदेश र जिल्ला क्रिकेटलाई लगातार व्यस्त राख्न सक्नुपर्छ । लगातार बलियो टोलीसँग सिरिज खेलाउनुपर्छ । घरेलु क्रिकेट, क्लब, स्कुल र एकेडेमीमा प्राथमिकतामा राख्नुपर्छ ।

हाम्रो भन्दा राम्रो खेलाडीलाई मौका दिनुपर्छ । खेलाडीले पनि अतिरिक्त जिम्मेवारी लिएर खेल्न आवश्यक देखिन्छ । कप्तानले टिमलाई एक बनाएर अघि लान सक्नुपर्छ । अन्यथा लगातार खराब प्रदर्शन गर्दै गएमा नेपाली महिला क्रिकेट नै विस्तारै समाप्त नहोला भन्न सकिदैन ।

July 14, 2024

भारतद्वारा जित सहित जिम्बाब्वे भ्रमण अन्त्य

एजेन्सी – लगातार चौथो जित सहित भारतले विश्वकप पछिको पहिलो भ्रमण अन्त्य गरेको छ । पाँच खेलको टि-ट्वान्टी शृंखलाको अन्तिम खेलमा ४२ रनले जिम्बाब्वेलाई हराउँदै ४-१ ले जितेको हो । आईतवार भारतले दिएको १६८ रनको लक्ष्य पछ्याएको जिम्बाब्वे १८.३ ओभरमा १२५ रनमा समेटियो । जिम्बाब्वेका लागि डिअन मायर्सले सर्वाधिक ३४ रन बनाए । मारुमानीले र […]

July 13, 2024

सिन्धुपाल्चोकमा क्रिकेट प्रशिक्षक प्रशिक्षण

सिन्धुपाल्चोक (हाम्रो खेलकुद)- सिन्धुपाल्चोकका सामुदायिक तथा संस्थागत विधालयका खेल शिक्षकका लागि विद्यालय क्रिकेट प्रशिक्षक प्रशिक्षण तथा अनुशिक्षण कार्यक्रम सम्पन्न भएको छ। सिन्धुपाल्चोक जिल्ला क्रिकेट संघको आयोजनामा तथा ग्रेट हिमालय क्रिकेट एकेडेमीको समन्वयमा प्रशिक्षण भएको थियो। ग्रस रुट क्रिकेट विकासको पहिलो खुड्किला विद्यालय बाट नै क्रिकेटको सुरूवात गर्नुपर्ने र शिक्षकले त्यसमा महत्वपूर्ण भुमिका रहने भएकोले प्रशिक्षण […]

July 13, 2024

भारतलाई एक खेल अगावै श्रृंखला

एजेन्सी – लगातार तेस्रो खेलमा सफलता निकालेको भारतीय क्रिकेट टोलीले जिम्बाब्वे विरुद्धको टि-ट्वान्टी श्रृंखला एक खेल अगावै जितेको छ । पहिलो खेलमा हार बेहोरेको भारतले लगातार तीन खेल जित्दै शृंखला ३-१ ले जितेको हो । हरारेमा शनिबार भएको चौथो खेलमा भारतले घरेलु टोलीलाई १० विकेटले पराजित गरेको हो । १ सय ५३ रनको लक्ष्य भारतले […]

Success

Thank you for your time.