एजेन्सी – ओपनर डेभन कन्वे र डर्याल मिचेलको उत्कृष्ट शतकमा न्युजिल्यान्डले पहिलो ओडिआई खेलमा घरेलु टोली इंग्ल्यान्डमाथि ८ विकेटको सानदार जित हात पारेको छ । यो जितसँगै चार ओडिआई खेलको सिरिजमा न्युजिल्यान्डले १-० को अग्रता लिएको छ ।

जितको लागि २ सय ९२ रनको बलियो विजयी लक्ष्य पछ्याएको न्युजिल्यान्डले ४५.४ ओभरमा २ विकेट गुमाउँदै पूरा गर्यो । न्युजिल्यान्डको जितमा डर्याल मिचेलले ९१ बलमा ७ चौक र ७ छक्कासहित १ सय १८ रनको विष्फोटक अविजित शतकीय इनिङ खेले ।

डेभन कन्वे १ सय २१ बलमा १३ चौका र १ छक्कासहित १ सय ११ रनमा नटआउट रहे । तेस्रो विकेटका लागि कन्वे र मिचेलले १ सय ५२ बलमा १ सय ८० रनको अजिजित साझेदारी गरेका थिए । विल योंग २९ र हेनरी निकोलस २६ रनमा आउट भए । इंग्ल्यान्डका आदिल राशिद र डेविड विल्लीले एक एक विकेट लिए ।

त्यसअघि कार्डिफमा टस हारेर पहिला ब्याटिङको निम्तो पाएको घरेलु टोली इंग्ल्यान्डले निर्धारित ५० ओभरमा ६ विकेट गुमाउँदै २ सय ९१ रन बनाएको थिये । उक्त योगफल जितको लागि पर्याप्त देखिएन ।

इंग्ल्यान्डका कप्तान जस बटलरले ६८ बलमा ५ चौका र २ छक्कासहित सर्वाधिक ७२ रनको इनिङ खेलेका थिए । ओपनर ह्यारी ब्रुक र डेविड मलानले १५ ओभरमा ८० रन जोड्दै इंग्ल्यान्डलाई उत्कृष्ट सुरुवात दिलाएका थिए ।

मलान ५३ बलमा ९ चौकासहित ५४ रनमा स्पिनर रचिन रविन्द्रको बलमा आउट भए । ब्रुक ४१ बलमा २ चौकासहित २५ रनमा आउट भए । फिनिसर लियाम लिभिङस्टोनले ४० बलमा ३ चौका र ३ छक्कासहित ४२ रनको आक्रामक इनिङ खेलेका थिए । डेविड विल्ली ११ बलमा २ चौका र १ छक्कासहित २१ रनमा नट आउट रहे ।

न्युजिल्यान्डको जितमा टिम साउथीले १० ओभरमा ७१ रन खर्चेर २ विकेट लिएका थिए । रचिन रविन्द्रले १० ओभरमा ४८ रन खर्चेर ३ विकेट लिए । लोकी फर्गुसनको नाममा १ विकेट रह्यो । दोस्रो खेल शनिबार साउथह्याप्टनमा हुनेछ ।