काठमाडौं (हाम्रो खेलकुद) – बाग्मती प्रदेश क्रिकेट संघले नेपाल क्रिकेट संघ (क्यान) को आसन्न निर्वाचनका लागि अध्यक्ष पारस खड्कासहित ३ जना प्रतिनिधिको चयन गरेको छ ।

प्रदेशको निर्वाचनपछि शनिबार बसेको पहिलो प्रदेश क्रिकेट कार्यसमितिको बैठकले काठमाडौंका खड्कासहित ललिपुरका शेखर श्रेष्ठ र मकवानपुरका प्रेमबहादुर क्षेत्रीलाई प्रादेशिक प्रतिनिधि चयन गरेको हो ।

प्रदेश संघको भदौं १५ गते सम्पन्न साधारण सभाले खड्कालाई अध्यक्षमा निर्वाचित गरेको थियो । क्यानको निर्वाचिनसहितको साधारण सभा असोज ५ र ६ गते काठमाडौंमा हुँदैछ ।

बैठकले प्रादेशिक क्रिकेट सञ्चालनको लागि विभिन्न उपसमिति गठन गरि संयोजक तोकेको छ । आर्थिक समितिमा अध्यक्ष खड्का, प्रशन्न शाक्य र संजोग पोखरेल रहेका छन् ।

वसन्तराज सत्याल (अरुण) को संयोजकत्वमा सुजन महर्जन, नीरा राजोपाध्याय, राजु खड्का, विनोद बानियाँ, सुरज शाक्य र रिकेश लामा सदस्य रहेको प्राविधिक समिति गठन भएको छ । विकास समितिमा अनुजमान श्रेष्ठ, धिरज श्रेष्ठसहित अन्य तीन सदस्य रहने छन् ।
प्रदेशको क्रिकेट निर्देशकको जिम्मेवारी अनिल अधिकारीलाई दिएको छ । महिला प्रदेश क्रिकेट संघको महिला क्रिकेट संयोजकमा राष्ट्रिय टोलीकी पूर्व कप्तान राजोपाध्यायलाई चयन गरिएको छ । त्यस्तै बैठकले खेलाडी छनोट समिति अर्को बैठकमा गठन गर्ने निर्णय गरेको छ ।

२१ः३७ बजे सम्पादन गरिएको ।