एजेन्सी – पाकिस्तानले एसिया कपको सुपर फोर खेलमा भारतविरुद्ध टस जितेर पहिला फिल्डिङ गर्ने निर्णय लिएको छ । श्रीलंकाको कोलोम्बोमा भएको टसमा पाकिस्तानका कप्तान बाबर आजमले टस जितेर पहिला फिल्डिङ गर्ने निर्णय लिएका हुन् ।

पाकिस्तान सुपर फोरमा दोस्रो जित हात पार्न चाहन्छ । पहिलो खेलमा पाकिस्तानले सुपर फोरमा बंगलादेशलाई ७ विकेटले हराएको थियो । भारत भने सुपर फोरमा पहिलो खेल खेल्दैछ ।

समूह ए बाट पाकिस्तान विजेता र भारत उपविजेता हुँदै सुपर फोरमा स्थान बनाएका हुन् । दुबै टोलीले नेपाललाई हराएका थिए ।

भारतले आजको खेलमा दुई परिवर्तन गरेको छ । लोकेश राहुल र जस्प्रित बुमराह भारतीय प्लेइङ ११ मा फर्किएका छन् । श्रेयस ऐर र मोहम्मद शामी आजको खेलमा बेन्चमा छन् ।

समूह चरणमा भारतको १० विकेटनै पाकिस्तानका तीव्र गतिका बलरले लिएका थिए । यस खेललाई भारतको ब्याटिङ र पाकिस्तानको तीव्र गतिको बलिङको भिडन्तको रुपमा समेत लिएको छ ।

भारत समूह चरणमा पाकिस्तानसँग पालेकेले क्रिकेट रंगशालामा २ सय ६६ रनमा अल आउट भएको थियो । पाकिस्तानका तीव्र गतिका बलर शाहिन शाह अफ्रिदीले चार विकेट लिएका थिए । नसिम शाह र हरिस रौफले ३–३ विकेट लिएका थिए । बायाँ हाते बलर अफ्रिदीको स्वींग र गति खेल्न सहज हुनेछैन ।

भारतको प्लेइङ ११ :

रोहित शर्मा (कप्तान), शुभमन गिल, विराट कोहली, जस्प्रित बुमराह, लोकेश राहुल, हार्दिक पान्ड्या, ईशान किशन, रविन्द्र जडेजा, शार्दुल ठाकुर, मोहम्मद शिराज र कुलदीप यादव ।

पाकिस्तानको प्लेइङ ११ :

फखार जमान, इमाम उल हक, बाबर आजम (कप्तान), मोहम्मद रिजवान (विकेटकिपर), अघा अली सलमान, इफ्तिखर अहमद, सादब खान, फहिम अशरफ, शाहिन शाह अफ्रिदी, नसिम शाह र हरिस रौफ ।