एजेन्सी – एसिया कपको सुपर फोरमा वर्षाको कारण स्थगित भारत र पाकिस्तानबीचको बाँकी खेल आज हुनेछ ।आज खेल दिउँसो नेपाली समय अनुसार दिउँसो ३ः१५ बजे सुरु हुनेछ ।

श्रीलंकाकाको कोलोम्बोमा आइतबार टस हारेर पहिला ब्याटिङको निम्तो पाएको भारतले २४.१ ओभरमा २ विकेट गुमाउँदै १ सय ४७ रन बनाएको अवस्थामा वर्षा सुरु भएको थियो । लगातार वर्षाको कारण पुनः खेल हुन सकेन ।

भारतले खेल हिजैको अवस्थाबाट सुरुवात गर्नेछ । भारत र पाकिस्तानबीचको खेलमा रिजर्भ डे राखिएको थियो । त्यसैले खेल जहाँ रोकिएको थियो त्यहिँबाट सुरु हुनेछ । आज पनि खेल हुन नसकेको अवस्थामा दुबै टोलीले एक एक अंक बाँड्नेछन् ।

भारतलाई पहिलो विकेटका लागि रोहित शर्मा र शुभमन गिलले १६.४ ओभरमा १ सय २१ रनको शानदार शतकीय साझेदारी गरेका थिए । रोहित शादब खानको बलमा फहिम अशरफबाट क्याच आउट भएका थिए ।

रोहित शर्मा ४९ बलमा ६ चौका र ४ छक्कासहित ५६ रनमा आउट भए । गिल ५२ बलमा १० चौकासहित ५८ रनमा क्याच आउट भएका थिए । शाहिन शाह अफ्रिदीको बलमा एक्स्ट्रा कभरमा अघा सलमानबाट क्याच आउट भए ।

भारतका विराट कोहली ८ र लोकेश राहुल १७ रनमा अविजित थिए । समूह चरणमा भारत र पाकिस्तानबीचको खेल पनि बर्षाकै कारण रद्द भएको थियो । भारत पाकिस्तानसँग उक्त खेलमा २ सय ६६ रनमा अल आउट भएको थियो । सुपर फोरमा भारतको यो पहिलो खेल हो । पाकिस्तानले भने सुपर फोरमा बंगलादेशलाई ७ विकेटले हराएको थियो ।