काठमाडौं (हाम्रो खेलकुद) – आइसिसी महिला टि२० विश्वकप एसिया क्षेत्र छनोट खेलेर राष्ट्रिय महिला क्रिकेट टोली स्वदेश फर्किएकोछ । नेपाली क्रिकेट टोली सोमबार बिहान त्रिभुवन विमानस्थल आइपुगेको हो ।

मलेसियामा सम्पन्न एसिया क्षेत्र छनोटमा नेपाल सेमिफाइनलमा थाईल्यान्डसँग ४६ रनले पराजित हुँदै ग्लोबलमा पुग्न सकेको थिएन । रुविनाले अपेक्षा अनुसार खेल्न नसकेको बताएकी छिन् ।

‘हामीले सोचे जस्तो जुन अपेक्षा गरेर खेलाडीहरुलाई जिम्मेवारी दिएर यो भूमिकामा खेल भनेर भनेका थियौं । टिम नयाँ पनि थियो । सिधैं धेरै अपेक्षा गर्न पनि मिल्दैन । उनीहरुलाई अझै अनुभव चाहिँएको हो की भन्ने हो । चार देश सम्मिलित सिरिजमा पछिल्लो दुई वर्षदेखी हराउन नसकेको हङकङलाई हराउने एउटा सकरात्मक पक्ष पनि हो’, रुविनाले स्वदेश फर्किएपछि भनिन् ।

रुविना नेपाली महिला क्रिकेट विकास गर्न दीर्घकालिन सोच आवश्यक भएको बताउँछिन् । ‘महिला क्रिकेट विकास गर्न दीर्घकालिन सोच आवश्यक छ जस्तो लाग्छ । एउटा प्रतियोगिता खेल्न जान्छौं । त्यसअघि सिरिज खेल्छौं । तर त्यसअघि हामी के गरेका थियौं भन्ने हो । केहि दिन अभ्यास गरेका हुन्छौं । हामी अभ्यास त गरेका हुन्छौं तर ठाउँमा चाहिँ आउन सकेको छैन । हामीले गर्नी तरिकाले नगरेको हो की सिकाउने मान्छे नभएको हो त्यो मलाई पनि थाहा भएन’, उनले भनिन् ।

रुविना ठूला सफलता हात पार्न नसक्दा दुःख लाग्ने बताउँछिन् । ‘मलाई दबाब भन्दा पनि दुःख लाग्छ । हामीले म्याच विनरहरु निकाल्न सकेका छैनौं । यो प्रतियोगितामा मैले खासै राम्रो खेलिन । खेल नै कस्तो उल्टोफुल्टो भयो । म्याच विनर नदेख्दा आफूहरुले नै खेल्न पर्नी हो की भन्ने अनुभव हुन्छ’, उनले भनिन् ।

नेपालले समूह चरणमा मलेसियालाई पाँच रन, बहराइनलाई १० विकेट, भुटानलाई ३ विकेट र कतारलाई ९ विकेटले हराएको थियो । युएईसँग भने वर्षाको कारण खेल रद्द भएको थियो । नेटरनरेटका कारण युएई समूह विजेता र नेपाल उपविजेता बन्दै सेमिफाइनल खेलेका थिए ।

थाईल्यान्डले नेपाललाई ४६ रन तथा अर्को सेमिफाइनल खेलमा युएईले हङकङलाई ४७ रनले हराएको थियो । फाइनलमा युएईले थाईल्यान्डलाई ६ रनले हराउँदै उपाधि जितेका थिए । एसिया क्षेत्र छनोटबाट थाईल्यान्ड र युएईले ग्लोबल छनोटमा स्थान बनाएका छन् ।

रुविनाको पूरा भिडियो :