एजेन्सी – उपाधिको प्रमुख दाबेदार भारतले एसिया कपको सुपर फोर खेलमा आज श्रीलंकासँग खेल्दैछ । खेल नेपाली समय अनुसार दिउँसो ३ : १५ मा श्रीलंकाको कोलोम्बोमा सुरु हुनेछ ।

सुपर फोरमा दुबै टोली लगातार दोस्रो जित निकाल्न चाहन्छ । भारत यस खेलमा विजयी भएमा एक खेल अगावै ४ अंकका साथ फाइनलमा पुग्नेछ । भारतले सुपर फोरमा पाकिस्तानलाई २ सय २८ रनले हराएको थियो ।

भारत विजयी हुँदा ४ अंक फाइनलमा पुग्न पर्याप्त हुनेछ । त्यसपछि श्रीलंका र पाकिस्तान मध्य एक टोली मात्रै ४ अंकमा पुग्न सक्नेछन् । भारत विजयी हुँदा बिहीबार श्रीलंका र पाकिस्तानबीचको खेल निर्णायक बन्नसक्छ । बंगलादेश भने सुपर फोरबाट लगातार दुई हारका साथ बाहिरि सकेको छ ।

पाकिस्तानलाई हराउन भारतका विराट कोहलीले १ सय २२, लोकेश राहुलले १ सय ११, रोहित शर्मा ५६ र शुभमन गिल ५८ रन बनाएका थिए । राहुल र कोहलीको प्रदर्शन निकै महत्वपूर्ण हुनेछ । भारतको ब्याटिङमा गहिराई छ । तल्लोक्रममा हार्दिक पान्ड्या, ईशान किशन र रविन्द्र जडेजाले गर्दा मजबुत ब्याटिङ छ ।

जस्प्रित बुमराह टोलीमा फर्किएपछि भारतको बलिङ पनि उत्कृष्ट छ । बुमराह, मोहम्मद शिराज र शार्दुल ठाकुर तीव्र गतिका बलर हुन् । हार्दिक पान्ड्या चौथो विकल्प हुनेछन् ।

स्पिनर कुलदीप यादवले पाँच विकेट लिँदै पाकिस्तानको इनिङ ध्वस्त पारेका थिए । कुलदीप श्रीलंकाका ब्याटरलाई टाउको दुखाइको विषय बन्नसक्छन् । भारतले यसअघि पाकिस्तानविरुद्ध वर्षाको कारण लगातार दुई दिन खेल्नु परेको थियो । त्यसैले भारतलाई केहि घाटा हुनसक्छ ।

यता श्रीलंका घरेलु मैदान र दर्शकको भरपूर्ण फाइदा उठाउन चाहन्छ । ओपनर पाथुम निसांका, विकेटकिपर कुशल मेन्डिस र मध्यक्रमका ब्याटर सदिरा समाराविक्रमा प्रमुख ब्याटर हुन् । यी तीन ब्याटरको उच्च प्रदर्शन विना भारतलाई हराउन मुश्किल हुने देखिन्छ ।

अनुभवी ओपनर दिमुथ करुणारत्ने, बायाँ हाते ब्याटर चरिथ असलंका र अलराउन्डर धनन्जय डि सिल्भा पनि राम्रो ब्याटिङ गर्ने गर्दछन् । कप्तान दासुन शानकाको लय श्रीलंकालाई केहि चिन्ता बढेको छ । प्रमुख खेलमा शानकाबाट सानदार प्रदर्शन चाहन्छ ।

भारतविरुद्ध शानकाको प्रदर्शनमा राम्रो इतिहास पनिछ । गत जनवरीमा गुवाहाटीमा शानकाले भारतविरुद्ध १ सय ८ रनको शतकीय इनिङ खेलेका थिए । प्रमुख बलर दुश्मन्था चामिरा र स्पिनर वानिन्दु हसरंगा नहुँदा श्रीलंकाको बलिङ आक्रामण केहि कमजोर बनेको छ ।

तर युवा बर मथिसा पाथिराना (बेबी मलिङ्गा) ले सानदार प्रदर्शन गर्दै आएका छन् । पाथिराना र स्पिनर महेश थिक्सेनाको प्रदर्शन श्रीलंकाको लागि बलिङमा निकै महत्वपूर्ण हुनेछ ।