एजेन्सी – भारतीय क्रिकेट टोलीका कप्तान रोहित शर्माले ओडिआईमा आफ्नो करिअरको १० हजार रन पूरा गरेका छन् । एसिया कपको सुपर फोर खेलमा घरेलु टोली श्रीलंकाविरुद्ध रोहित शर्माले सुरुवाती २२ रन बनाउँदै १० हजार रन पूरा गरेका हुन् । उनी विश्व क्रिकेटमा ओडिआईमा १० हजार रन पूरा गर्ने १५ औं ब्याटर हुन् ।

ओडिआईमा भारतीय पूर्व ब्याटर सचिन तेन्दुलकरले ४ सय ६३ खेलमा ४९ शतकसहित कुल १८ हजार ४ सय २६ रन बनाएका छन् । उनीपछि श्रीलंकाका कुमार सांगकाराले ४ सय ४ खेलमा १४ हजार २ सय ३४ रन बनाएका छन् ।

३६ वर्षीय रोहित शर्माले २ सय ४८ ओडिआई खेलमा ३० शतक, ३ दोहोरो शतक र ५० अर्धशतक प्रहार गरेका छन् । ओडिआईको एकै खेलमा सर्वाधिक २ सय ६४ रन बनाउने कीर्तिमान रोहित शर्माको नाममा छ । उनले २०१४ मा श्रीलंकाविरुद्ध २ सय ६४ रनको इनिङ खेलेका थिए ।

रोहितले २००७ मा भारतबाट आयरल्यान्डविरुद्ध ओडिआईमा डेब्यू गरेका थिए । सन् २००७ मा भारतले टि२० विश्वकप र २०१३ मा च्याम्पियन्स ट्रफीको उपाधि जित्दा रोहित टोलीका सदस्य थिए ।

रोहित भारतबाट ओडिआईमा १० हजार रन पूरा गर्ने छैटौं ब्याटर हुन् । विराट कोहलीले १३ हजार २४, सौरभ गांगुली ११ हजार ३ सय ६३, राहुल द्रविडले १० हजार ६ सय ८९, महेन्द्रसिंह धोनीले १० हजार ७ सय ७३ रन बनाएका छन् ।