एजेन्सी – मध्यक्रमका ब्याटर एडेन माक्ररमको उत्कृष्ट शतकमा घरेलु टोली दक्षिण अफ्रिकाले तेस्रो ओडिआई खेलमा अष्ट्रेलियालाई ३ सय ३९ रनको विशाल लक्ष्य दिएको छ । सेड्गार्स पार्कमा टस हारेर पहिला ब्याटिङको निम्तो पाएको दक्षिण अफ्रिकाले निर्धारित ५० ओभरमा ६ विकेट गुमाउँदै ३ सय ३८ रन बनायो ।

एडेन माक्ररम ७४ बलमा ९ चौका र ४ छक्कासहित १ सय २ रनमा क्रिजमा रहे । माक्ररमले अन्तिम बलमा जोश हेजलवुडलाई चौका हान्दै ओडिआई करिअरको दोस्रो शतक पूरा गरेका थिए । अन्तिम बलमा शतक पूरा गर्न उनलाई दुई रन आवश्यक थियो ।

ओपनर तथा विकेटकिपर क्विन्टन डि ककले ७७ बलमा १० चौका र २ छक्कासहित ८२ रन जोड्दै राम्रो सुरुवात दिलाएका थिए । कप्तान टेम्बा बभुमा ६२ बलमा ६ चौकासहित ५७ रनमा आउट भए । दक्षिण अफ्रिकालाई ओपनर डि कक र टेम्बा बभुमाले २२.५ ओभरमा १ सय ४६ रनको शतकीय साझेदारी गर्दै उत्कृष्ट सुरुवात दिलाएका थिए ।

डि कक स्पिनर ट्रविस हेडको बलमा डेविड वार्नरबाट क्याच आउट हुन पुगेका थिए । रिजा हेन्ड्रिक्स ४५ बलमा ३ चौकासहित ३९, हेनरिक क्लासेन डक र डेविड मिलर ८ रनमा आउट भए । मार्को यानसन १६ बलमा ४ चौका र १ छक्काससहित ३२ रनमा आउट भए ।

अष्ट्रेलियाका पार्टटाइम स्पिनर ट्रविस हेडले १० ओभरमा ३९ रन खर्चेर २ विकेट लिए । नाथन एलिस, मार्कस स्टोइनिस र तनविर संघाले एक एक विकेट लिए । पाँच खेलको सिरिजमा अष्ट्रेलिया २-० ले अघि छ ।