एजेन्सी – पाकिस्तानले एसिया कपको सुपर फोर खेलमा श्रीलंकाविरुद्ध टस जितेर पहिला ब्याटिङ गर्ने भएको छ । कोलोम्बोमा भएको टसमा पाकिस्तानका कप्तान बाबर आजमले टस जितेर पहिला ब्याटिङ गर्ने निर्णय लिएका हुन् । खेल ४५-४५ ओभरको हुनेछ । पावर प्ले ९ ओभरको हुनेछ ।

श्रीलंकाले टोलीमा दुई परिवर्तन गरेको छ । आजको खेलमा तीव्र गतिका बलर प्रमोद मदुशान र ओपनर कुशल परेरालाई मौका दिएको छ । कसुन रजिथा र दिमुथ करुणारत्नेलाई बेन्चमा राखेको छ । उता पाकिस्तानले पाँच खेलाडी परिवर्तन गरेको छ । बुधबार नै पाकिस्तानले पाँच परिवर्तन गरेको थियो ।

तर उक्त परिवर्तनबाट थप दुई परिवर्तन गरेको छ । ओपनर इमाम उल हक घाइते भएपछि फखार जमान टोलीमा फर्किएका छन् । जमान बुधबार पाकिस्तानको बेन्चमा थिए । त्यस्तै साउद सकिलको स्थानमा अब्दुल्लाह शफिक खेल्ने भएका छन् । साउद सफिकलाई ज्वरो आएको छ ।

पाकिस्तानको ओपनर इमाम उल हक, मध्यक्रमका ब्याटर अघा सलमान, तीव्र गतिका बलर हरिस रौफ, नसिम शाह र फहिम अशरफलाई बेन्चमा राखेको छ । युवा ब्याटर अब्दुल्लाह शफिक, स्पिन अलराउन्डर मोहम्मद नवाज, तीव्र गतिका बलर मोहम्मद वासिम जुनियर र जमान खानलाई श्रीलंकाविरुद्ध खेलाउनेछ । तीव्र गतिका बलर जमानको यो डेब्यू हो । रौफ र नसिम चोटका कारण टोलीमा नभएका हुन् ।

यस खेलको विजेता टोलीले फाइनलमा स्थान बनाउनेछ । तर वर्षाको कारण खेल रद्द भएमा श्रीलंका नेटरनरेटको कारण फाइनलमा स्थान बनाउनेछ ।

सुपर फोर खेलमा पाकिस्तानले बंगलादेशलाई ७ विकेटले हराउँदा भारतसँग २ सय २८ रनको लज्जास्पद हार व्यहोरेको थियो । उता श्रीलंकाले बंगलादेशलाई २१ रनले हराउँदा भारतसँग ४१ रनको हार व्यहोरेको थियो । भारत २ खेलमा ४ अंकका साथ शीर्ष स्थानमा रहँदै फाइनलमा पुगेको छ ।

समान २ अंक भएपनि नेटरनरेटको कारण श्रीलंका दोस्रो र पाकिस्तान तेस्रो स्थानमा छन् । श्रीलंकाको नेटरनरेट माइनस ०.२०० र पाकिस्तानको माइनस १.८९२छ ।