एजेन्सी – साविक विजेता तथा उपाधिको प्रमुख दाबेदार इंग्ल्यान्डले आगमी महिना भारतमा हुने एकदिवसीय विश्वकप खेल्ने मजबुत टोली घोषणा गरेको छ । जस बटलरको कप्तानीमा इंग्ल्यान्डले युवा ब्याटर ह्यारी ब्रुकलाई टोलीमा समेटेको छ । यसअघि प्रारम्भिक टोलीमा ब्रुक थिएनन् ।

इंग्ल्यान्डले २०१९ मा विश्वकप उपाधि जित्दा ९ खेलाडीलाई भारतमा हुने विश्वकपको लागि निरन्तरता दिएको छ । तीव्र गतिका बलर रिस टोप्ली, ह्यारी ब्रुक, लियाम लिभिङस्टोन, डेविड मलान, साम करन र गस एटिकिन्सन बाहेक अन्य सबै खेलाडीले २०१९ को विश्वकप खेलेका थिए ।

बेन स्टोक्सले यसै वर्ष सुरुवातमा ओडिआई क्रिकेटबाट सन्न्यास लिएका थिए । तर इंग्ल्यान्डले विश्वकप खेल्न आग्रह गरेपछि उनी टोलीमा फर्किएका थिए । यसै साता स्टोक्सले न्युजिल्यान्डसँग तेस्रो ओडिआई खेलमा १ सय ८२ रनको सानदार शतकीय इनिङ खेलेका थिए । स्टोक्स विश्वकपमा प्रमुख ब्याटरको रुपमा खेल्नेछन् । उनले बलिङ भने गर्ने छैनन् ।

ओपनर जेसन रोयलाई बाहिर राख्दै ब्रुकलाई मौका दिएको छ । ब्रुकले न्युजिल्यान्डसँग समान चार टि२० र ओडिआई सिरिजमा सानदार प्रदर्शन गरेका थिए । पहिलो पटक एकदिवसीय विश्वकप टोलीमा परेका लिभिङस्टोन विष्फोटक ब्याटर हुन् । उनले स्पिन बलिङ गर्ने गर्दछन् । त्यस्तै एटकिन्सन र रिस टोप्ली तीव्र गतिका बलर हुन् ।

जस बटलर, जोनी बेयरस्टो, जो रुट, बेन स्टोक्स र डेविड मलान जस्ता ब्याटर छन् । अलराउन्डर साम करन, मोईन अली, लिभिङस्टोन हुनेछन् । स्पिनरमा मोईन अली र आदिल राशिद हुनेछन् । यी दुई अनुभवी स्पिनरको प्रदर्शन झनै महत्वपूर्ण हुनेछ । मार्क वुड, क्रिस वोक्स, रिस टोप्ली, गस एटकिन्सन तीव्र गतिका बलर हुन् ।

इंग्ल्यान्डको ब्याटिङ र बलिङ दुबै उत्कृष्ट छ ।इंग्ल्यान्डले अक्टोबर ५ मा न्युजिल्यान्डसँग खेल्दै विश्वकपमा सुरुवात गर्नेछ । २०१९ को विश्वकपको सुपर ओभर पनि टाई भएपछि इंग्ल्यान्डले बढी चौका र छक्का प्रहार गरेको आधारमा विश्वकप जितेको थियो । चोटका कारण २०१९ का विश्वकपका हिरो जोफ्रा आर्चर भने टोलीमा छैनन् ।

इंग्ल्यान्डको टोली :

जस बटलर (कप्तान), मोईन अली, गस एटकिन्सन, जोनी बेयरस्टो, ह्यारी ब्रुक, साम करन, लियाम लिभिङस्टोन, डेविड मलान, आदिल राशिद, जो रुट, बेन स्टोक्स, रिस टोप्ली, डेविड विल्ली, मार्क वुड र क्रिस वोक्स ।