एजेन्सी – यसै साता सम्पन्न एसिया कप २०२३ को च्याम्पियन भारतविरुद्ध नेपाल पावर प्लेमा सबैभन्दा उत्कृष्ट क्रिकेट खेल्ने टोली बनेको छ । नेपालले आफ्नो इतिहासमा पहिलो पटक भारतसँग खेलेको थियो ।

नेपालले श्रीलंकाको कान्डीमा भारतविरुद्ध टस हारेर पहिला ब्याटिङको निम्तो पाउँद ४८.२ ओभरमा २ सय ३० रनमा अल आउट भएको थियो । नेपालले पहिलो पावर प्ले अर्थात सुरुवाती १० ओभरमा ६५ रन बनाउँदा १ विकेट गुमाएको थियो । यस प्रतियोगितामा भारतविरुद्ध पावर प्लेमा कुनैपनि देशले बनाएको यो उच्च रन बन्यो ।

उता पाकिस्तान भारतले दिएको ३ सय ५७ रनको विशाल विजयी लक्ष्य पछ्याउनेक्रममा ३२ ओभरमा १ सय २८ रनमा अल आउट भएको थियो । पाकिस्तानले सुरुवाती १० ओभरमा १ विकेट गुमाउँदै ४३ रन बनाएको थियो ।

सुपर फोरमै भारतले दिएको २ सय १४ रनको विजयी लक्ष्य पछ्याएको श्रीलंका ४१.३ ओभरमा १ सय ७२ रनमा अल आउट भएको थियो । श्रीलंकाले सुरुवाती १० ओभरमा ३ विकेट गुमाउँदै ३९ रन बनाएको थियो ।

एसिया कपमा भारत बंगलादेशसँग ६ रनले पराजित हुन पुगेको थियो । जितको लागि २ सय ६६ रनको विजयी लक्ष्य पछ्याएको भारत २ सय ४९ रन बनाएको थियो । बंगलादेशले पावर प्लेमा भारतविरुद्ध १० ओभरमा ३ विकेट गुमाउँदै ४४ रन बनाएको थियो ।

उता फाइनलमा श्रीलंका भारतसँग ५० रनमा अल आउट भएको थियो । श्रीलंकाले सुरुवाती १० ओभरमा ३१ रन बनाउँदा ६ विकेट गुमाएको थियो ।

पाकिस्तान र श्रीलंकाले भन्दा नेपालले भारतविरुद्ध धेरै राम्रो ब्याटिङ गर्यो । भारतविरुद्ध बंगलादेशपछि ठूलो योगफल बनाउने टोली नेपाल रह्यो । पावर प्लेमा भारतविरुद्ध नेपालले प्रतियोगिताकै उत्कृष्ट प्रदर्शन गर्यो । श्रीलंकाले फाइनलमा नेपालले पावर प्लेमा बनाएको रन जति पुरै टोलीले बनाउन सकेन ।

नेपाल एसिया कपमा भारतसँग १० विकेट र पाकिस्तानसँग २ सय ३८ रनले पराजित हुँदै बाहिरिएको थियो । भारतले फाइनलमा श्रीलंकालाई १० विकेटले हराउँदै उपाधि जितेको थियो ।