एजेन्सी – कतारमा जारी गल्फ क्रिकेट टि२० च्याम्पियनसिपमा बहराइनले ओमानलाई एक रनले पराजित गरेको छ । जितको लागि १ सय २४ रनको मध्यम विजयी लक्ष्य पछ्याएको ओमानले निर्धारित २० ओभरमा ९ विकेट गुमाउँदै १ सय २२ रन बनायो ।

ओमानका ओपनर कश्याप प्रजापतिले ५३ बलमा ३ चौकासहित ४९, जतिन्दर सिंहले ३, अकिब इलायसले डक, मोहम्मद नदिमले ७ र आयन खानले २४ रन बनाए । त्यस्तै मेहरान खान ३, रफिउल्लाह १४, नसिम खुशी ११ र सकिल अहमद ५ रनमा आउट भए ।

बहराइनका रिजवान बटले ४ ओभरमा २६ रन खर्चेर ४ विकेट लिए । इमरान अनवारले ४ ओभरमा २३ रन खर्चेर २ विकेट लिए ।

त्यसअघि दोहामा टस हारेर पहिला ब्याटिङको निम्तो पाएको बहराइनले २० ओभरमा ७ विकेट गुमाउँदै १ सय २३ रन बनाएको थियो । बहराइनका इमरान अलीले ५५ बलमा ३ चौका र १ छक्कासहित सर्वाधिक ४४ रन बनाए । हैदर बट २० र जुनैद अजिज १५ रन बनाए ।

ओमानका फयाज बटले ४ ओभरमा २९ रन खर्चेर ३ विकेट लिए । बिलाल खानले ४ ओभरमा १ मेडनसहित १७ रन खर्चेर २ विकेट लिए । अकिब इलायसले ४ ओभरमा १४ रन खर्चेर १ विकेट लिए ।

प्रतियोगितामा युएई, कुवेत, कतार, बहराइन, ओमान र साउदी अरेविया छन् । युएई ३ खेलमा ६ अंकका साथ शीर्षस्थानमा छ । कुवेत २ खेलमा ४ अंकका दोस्रो स्थानमा छ ।

शीर्ष दुई टोलीले फाइनलमा स्थान बनाउनेछन् । यो प्रतियोगिता आगमी महिना नेपालमा हुने आइसिसी टि२० विश्वकप एसिया क्षेत्र छनोट अघि गल्फ टोलीको तयारी समेत हो ।