हिमाल खरेल, बिर्तामोड

नेपाल क्रिकेट संघ (क्यान) को आसन्न केन्द्रीय कार्यसमिति चुनावका लागि प्रतिनिधि पठाउने विषयमा झापामा विवाद उत्पन्न भएको छ । हरेक जिल्लाबाट एक जना केन्द्रीय प्रतिनिधि चयन गर्नुपर्ने प्रावधान छ ।

केन्द्रीय प्रतिनिधिका लागि झापामा दुईजना आकंक्षी देखिएपछि विवाद भएको हो । झापाबाट केन्द्रमा प्रतिनिधि जान कार्यसमितिका सचिव लाक्पा लामा र सदस्य मनोज कटवाल आकांक्षी थिए । दुबैजना पछि नहटेपछि कार्यसमितिमा चुनाव नै भएको थियो ।

झापाको १५ सदस्यीय कार्यसमितिमा भएको चुनावमा कटुवालले पक्षमा १३ र लामाको पक्षमा २ म प्राप्त भएको थियो । तर, अध्यक्ष प्रविन थापा र सचिव लामाले एकपक्षीय ढंगले निर्णय गर्दै लामालाई केन्द्रीय प्रतिनिधि पठाउने पत्र क्यानमा पठाएको पाइएको छ ।

कटवालका अनुसार भदौ २२ गतेको बैठकको उपस्थितिमा हस्ताक्षर गराएर सचिव लामाले निर्णय आफूखुसी लेखेका हुन् । अन्य पदाधिकारी र सदस्यले माइन्युट हेर्न माग गर्दा लामाले नदिएकोमा उनीहरुले आपत्ति जनाएका छन् ।

बहुमत सदस्यहरुले लामााले माइन्युट कब्जा गरेर लुकाएको आरोप लगाएका छन् । क्यानको केन्द्रीय कार्यसमितिका लागि असोज ५ र ६ गते निर्वाचन काठमाडौंमा हुँदैछ ।