काठमाडौं (हाम्रो खेलकुद) – नेपाली क्रिकेट टोलीका स्पिनर ललितनारायण राजवंशीको राइट क्लाभिकल फ्राक्चर (ब्यूटिबोन) को शल्यक्रिया सफल भएको छ । ललितको आज बिहान ग्वार्कोमा रहेको बी एण्ड बी अस्पतालमा उनको शल्यक्रिया सफल भएको हो । चिकित्सक अमित जोशीको टोलीले ललितको शल्यक्रिया सफल रुपमा सम्पन्न गराएका छन् ।

ललित ६ देखी १२ हप्ता मैदान बाहिर रहनु पर्ने हुन्छ । ललितले अर्को साता देखी चीनमा हुने १९ औ एसियाली खेलकुद गुमाउने पक्का भएको छ । कार्तिक १३ देखी २० (अक्टोबर ३० देखी नोभेम्बर ६ ) सम्म टियु र मुलपानीमा हुने आइसिसी टि२० विश्वकप छनोट पनि गुमाउने उच्च सम्भावना छ । यद्यपी क्यानले विश्वकप छनोटसम्म फर्काउन प्रयास गर्ने जनाएको छ ।

‘ललितको शल्यक्रिया सफल भएको छ । अव उनको रिकभरमा भरपर्नेछ । हामीले विश्वकप छनोटसम्म फर्काउने प्रयास गरेका छौं’, क्यानका चिकित्सक अभिषेक सिंहले भने । ।

बुधबार टियु क्रिकेट मैदानमा अभ्यास खेलमा फिल्डिङ गर्नेक्रममा उनी घाइते भएका थिए । ललितले २० महिनापछि पुन शल्यक्रिया गर्नु परेको हो । ललितले सन् २०२२ जनवरीा बी एन्ड बी अस्पतालमा बायाँ खुट्टाको घुँडामा शल्यक्रिया गर्नु परेको थियो । त्यति बेलापनि ललितको शल्यक्रिया अमित जोशीले नै गरेका थिए ।

पछिल्लो समय नेपाली क्रिकेट टोलीबाट ललितले सानदार प्रदर्शन गरेका थिए । नेपाललाई ओडिआई मान्यता निरन्तरता गराउन र एसिया कपमा पुयाउन उनको योगदान निकै महत्वपूर्ण थियो । ललित नहुँदा नेपालको बलिङ आक्रामणमा ठूलो असर पर्नसक्छ । गत मार्चमा युएईलाई लिग २ को महत्वपूर्ण खेलमा ७१ रनमा अल आउट गर्न उनले एक्लै पाँच विकेट लिएका थिए ।

एसिसी प्रिमियर कपको फाइनलमा नेपाललाई उपाधि जिताउन ललितले ४ विकेट लिएपछि युएई १ सय १७ रन मै अल आउट भएको थियो । आइसिसी विश्वकप छनोटमा टेस्ट टोली जिम्बावे र वेस्टइन्डिजविरुद्ध पनि ललितले त्यतिनै उत्कृष्ट प्रदर्शन गरेका थिए ।

त्यस्तै एसिया कपमा भारत र पाकिस्तानविरुद्ध ललितको प्रदर्शन त्यतिनै प्रभावशाली रहेको थियो । ललितले २३ ओडिआईमा २८ र १२ टि२० आईमा १० विकेट लिएका छन् ।