काठमाडौं (हाम्रो खेलकुद) – महिला टि–ट्वान्टी विश्वकपको एसिया छनोटमा नेपाललाईं सेमिफाइनलसम्म पुर्याउँन महत्वपूर्ण भुमिका निर्वाह गरेका तीन महिला क्रिकेटर गृहनगर धनगढीमा सम्मानित भएका छन् ।

धनगढी क्रिकेट एकेडेमी(डिसिए)ले नेपाली टोलीमा रहेका धनगढीका कविता कुँवर, इश्वरी विष्ट र रुवि पौदारलाई बिहीबार सम्मान गरेको हो । ग्रेस इन्टरनेसनलका निर्देशक अन्ड्रु पौडेलले तीनैजनालाईं सम्मानपत्र र मायाँको चिनोसहित सम्मान गरे ।

सम्मानग्रहण गरेपछि कविताले ग्रासरुट क्रिकेटको विकासमा डिसिएको महत्वपूर्ण योगदान रहेको र लामो समयदेखि यहाँको क्रिकेट विकासमा भूमिका खेलेको संस्थाबाट सम्मानित हुन पाउँदा खुसी लागेको बताइन् ।

मुख्य अतिथि अन्ड्रुले राष्ट्रिय खेलाडीहरु देशको गहना भएको र खेलाडीलाई सम्मान गरेकोमा डिसिएलाई धन्यवाद ज्ञापन गरे । गत हप्ता भएको प्रतियोगितामा थाईल्यान्डसँग सेमिफाइनलमा पराजित हुँदै नेपाल प्रतियोगिताबाट बाहिरिएको थियो ।
डिसिएले अन्तर्राष्ट्रिय खेलाडीहरुलाईं शतप्रतिशत निशुल्क प्रशिक्षणको व्यवस्था मिलाउँदै आएको छ । साथै सबै महिला खेलाडीहरु निशुल्क प्रशिक्षणको व्यवस्था छ ।

डिसिएमा आधा दर्जन बढी अन्तर्राष्ट्रिय खेलाडीहरु प्रशिक्षणरत् छन् । डिसिएले महिला खेलाडीको विकासका लागि प्रिसेस कप क्रिकेट प्रतियोगिताको आयोजना गर्दै आएको छ । सम्मान कार्यक्रममा डिसिएका प्रशिक्षक राजु रिजाल, प्रबन्धक समुयल न्यौपानले लगायतको उपस्थिति थियो ।