भूपेन्द्र जि.सी,काठमाडौं

नेपाल क्रिकेट संघ (क्यान) को वार्षिक साधरण सभा तथा विशेष अधिवेशन आजबाट काठमाडौंमा सुरु हुँदैछ । दुई दिनसम्म चल्ने अधिवेशनमा चतुरबहादुर चन्दलाई अध्यक्ष पदमा राख्दै पूर्वकप्तान पारस खड्का सचिव पदमा लड्ने तयारी छ ।

समिकरण हेर्दा चन्द अध्यक्षमा निरन्तर उठ्दा उनले खड्कालाई सचिवसहित सबैलाई समावेश गरेर प्यानल नै खडा गर्दैछन् ।

‘सचिवमा उठ्ने तयारीमा छु । कसरी अघि बढ्ने भन्नेमा आज फेरि छलफल गर्दैछौं, उनले भने, समूह नै बनाएर लड्ने भन्ने त होइन । परिस्थति कस्तो हुन्छ । त्यसकै आधारमा अघि बढ्ने छौं ।’

चन्दको प्यानलमा कोषाध्यक्षमा पूर्व सदस्य पदम बहादुर खड्काको चर्चा छ । सबै पदमा सकेसम्म सर्वसम्मत गराउने प्रयास चन्दले गरेका छन् । तर त्यो सम्भवना कम देखिन्छ ।

कसको छ सम्भावना ?

चन्द र खड्का एउटै प्यानलमा लड्दा जित्न सक्ने सम्भावना बलियो रहेको छ । यदि अन्तिम समयसम्म केही नबदलिए चन्द र खड्काको प्यानलले सबै पदमा क्लिनस्वीप गर्ने सम्भावना छ ।

को हुन्छ विपक्षीमा ?

चन्दसँग अध्यक्षमा बर्दिया क्रिकेट संघका अध्यक्ष विनयराज भण्डारी लड्ने चर्चा छ । सचिवमा खड्का र क्यानका पूर्वकेन्द्रिय सदस्य प्रशान्त विक्रम मल्लबीच प्रतिस्पर्धा हुने चर्चा छ । वर्तमान कोषाध्यक्ष रोशन सिंहलाई चन्दले उपाध्यक्षमा मनाउने प्रयास गरेका छन् । तर सिंह उक्त पद लिन खासै इच्छुक देखिएका छैनन् ।

सिंहले नमानेको खण्डमा उनी कोषाध्यक्षमा लड्न सक्छन् । वर्तमान कार्यवाहक सचिव दुर्गाराज पाठकलाई सदस्यमा मनाउने प्रयास गरेका छन् । कर्णालीबाट सदस्यमा श्रीधर केसी, लुम्बिनीबाट प्रदिप मजगैया र सुदूपश्चिमबाट विक्रम विष्ट केन्द्र सदस्यमा चन्द प्यानलबाट उठ्ने सम्भावना छ। अन्य प्रदेशमा टुङ्गो लाग्न बाँकी छ ।

चन्द प्यानलको बलियो पकड

क्यान चुनावमा जिल्ला, प्रदेश, केन्द्रिय कार्यसमिति, नेपाल प्रशिक्षक संघ र स्कोर संघ गरि कुल ८६ मत रहन्छ । प्रमुख पद जित्न ४४ मत चाहिन्छ । चन्द र खड्काको तालमेलसँगै स्पष्ट बहुमत देखिन्छ । मधेश प्रदेश बाहेक अन्य सबैले चन्द प्यानललाई मतदान गर्ने सम्भावना छ । सिंह उपाध्यक्षमा मानेको खण्डमा सर्वसम्मतको सम्भावना रहन्छ ।

यदि खड्का र मल्ल लडेको खण्डमा मत केहि विभाजन हुनेछ । तर खड्का चुनाव लड्दा मधेश र लुम्बिनी बाहेक अन्य सबै प्रदेशको साथ रहनेछ । खड्काले मधेशमा तीन र लुम्बिनीमा चार मत चुनाव लड्दा पनि पाउने सम्भावना छ । चन्द प्यानलको समूहले ६० देखी ६५ मत ल्याउने अनुमान गरिएकोछ ।

बागमतीमा पनि चन्दको खड्कालाई साथ

खड्का काठमाडौं जिल्ला सदस्य हुँदै बागमती प्रदेशको अध्यक्षमा निर्वाचित भएका थिए । खड्काले बागमती प्रदेशको चुनावमा क्यानका कोषाध्यक्ष सिंह निकट उमेश पियालाई २३–१४ मत अन्तरले हराएका हुन् । चन्दले नेपाली क्रिकेट विकास गर्न खड्कालाई साथ दिने भएका हुन् ।

खड्कालाई बागमती प्रदेशको अध्यक्ष पदमा जिताउन चन्दले पनि साथ दिएका थिए । क्यानकै केहि प्रमुख पदाधिकारी भने खड्कालाई बागमती प्रदेशमा हराउन हरप्रायस गरेका थिए । तर चन्दको साथपछि सहजै जितेका थिए ।

खड्काबाट क्रिकेट विकासमा ठूलो आशा

चन्द अन्तिम पटक चुनाव लड्दैछन् । यसपछि उनी बैतडीबाट सांसदकोे चुनावमा लड्ने योजनामा छन् । अन्तिम कार्यकाल उनी विशेष बनाउन चाहन्छन् । यसअघिका दुई कार्यकाल आलोचना बढी खेप्नु पर्यो । नेपाली क्रिकेट टोलीको सफलतासँगै उनको पनि प्रशंसा हुँदै आएको छ । तेस्रो तथा अन्तिम कार्यकालमा उनी नेपाली क्रिकेट विकास गर्ने स्पष्ट मनासय बनाएका छन् । विशेषगरी चन्दले घरेलु क्रिकेट र संरचनामा जोड दिएका छन् ।

वर्तमान अवस्थामा घरेलु क्रिकेट र संरचना शून्य छ । त्यसको मुख्य कारण क्यानका वर्तमान कर्माचारी र पदाधिकारीले काम गर्न नसक्नु हो । नेपाली क्रिकेटले जुन रुपमा सफलता पाएकोछ त्यस अनुसार प्रायोजन ल्याउन सकेको छैन ।

क्यानले चार वर्षको अवधिमा दुई जनरल म्यानेजरलाई पदबाट निकालेको छ । क्रिकेट म्यानेजर विनोद दास अपेक्षा अनुसार काम गर्न नसकेको भन्दै चर्को आलोचनामा फस्दै आएका छन् । घरेलु क्रिकेट गराउनु पर्ने उनी क्रिकेट टोलीको टुरमा हिँडेको भन्दै आलोचना समेत खेप्नुपरेको छ ।

अब नेपाली क्रिकेटलाई अर्को स्तरमा पुर्याउन सक्ने खुबी खड्कामा देखिन्छ । विशेषगरि नेपाली आर्थिक बजारमा खड्काको धेरै राम्रो सम्बन्ध छ । नेपाली क्रिकेटलाई विश्वकप र टेस्ट मान्यता दिलाउने चन्दको सपना खड्काले पूरा गर्ने खुबी देखेपछि उनले साथ दिएका छन् ।

चन्दले नेपाली क्रिकेट विकास गर्न सबैलाई मिलाएर लैजाने बताउँदै आएका थिए । सबै कुरामा पारस प्रभावकारी हुनसक्ने भएपछि चन्दले राम्रो साथ दिएका छन् । समीकरण नबिग्रेको खण्डमा क्यान नेतृत्वमा चन्द र खड्काको सहकार्य हुने पक्का देखिन्छ ।

क्यानको चुनाव भने शनिबार हुनेछ । कार्यकाल चार वर्षको हुनेछ । खड्काले साढे दुई वर्षअघि अप्रत्याशित रुपमा नेपाली क्रिकेटबाट सन्न्यास लिनुको मुख्य कारण नै क्यान नेतृत्वमा आउनु थियो ।

बिहान ९ः४५ बजे सम्पादन गरिएको ।