एजेन्सी – कप्तान अकिब इलियासको अलराउन्ड प्रदर्शनमा ओमानले गल्फ क्रिकेट टि२० आई च्याम्पियनसिपको फाइनलमा युएईलाई ५ विकेटले हराउँदै उपाधि जितेको छ ।

जितको लागि १ सय ६४ रनको विजयी लक्ष्य पछ्याएको ओमानले १९.२ ओभरमा ५ विकेट गुमाउँदै पूरा गर्यो । कप्तान अकिब इलियासले ३३ बलमा ८ चौका र ४ छक्कासहित सर्वाधिक ६७ रनको योगदान दिए । त्यस्तै आयन खान ३८ बलमा ४ चौकासहित ५३ रनमा नटआउट रहे ।

शोएब खान २१ बलमा १ चौका र १ छक्कासहित २२ रनमा आउट भए । युएईका मोहम्मद जवादुल्लाह र जहुर खानले समान दुई विकेट लिए ।

त्यसअघि दोहामा टस जितेर पहिला ब्याटिङ रोजेको युएईले २० ओभरमा ५ विकेट गुमाउँदै १ सय ६३ रन बनाएको थियो । युएईका कप्तान मोहम्मद वासिमले ३१ बलमा २ चौका र ४ छक्कासहित सर्वाधिक ४६ रन बनाए ।

आसिफ खान ३३ बलमा १ चौका र ३ छक्कासहित ३८, अर्यांश शर्मा १० र वृत्य अरविन्द ४ रनमा आउट भए । बासिल हामिद २३ बलमा १ चौका र ३ छक्कासहित ३६ रनमा नटआउट रहे । अली नासिर १० बलमा १ चौका र २ छक्कासहित २० रनमा नटआउट रहे ।

ओमानका बिलाल खान र अकिब इलियासले समान दुई विकेट लिए । प्रतियोगितामा गल्फका ६ टोलीबीच प्रतिस्पर्धा भएको । नेपालमा अर्को महिना हुने टि२० विश्वकप छनोट अघि उक्त प्रतियोगिता तयारीको लागि गरेका हुन् ।