काठमाडौं (हाम्रो खेलकुद) – सरकारले नेपाली क्रिकेट खेलाडीलाई दिने विभिन्न पुरस्कार रकम अझैसम्म दिएको छैन । नेपाली क्रिकेट टोलीका कप्तान रोहित पौडेलले १९ औं एसियाली खेलकुद खेल्न आइतबार चीन जानुअघि सम्म पुरस्कार रकम नपाएको बताएका छन् ।

‘पैसा अहिले सम्म आएको छैन । आशा गरौं । भनेको त धेरै भइसक्यो । हेरौं अव कहिले आउँछ । धेरै पटक भनि सक्यौं । आउनेमा आशाबादी छौं’, उनले भने ।

प्रधानमन्त्री पुष्पकमल दाहाल प्रचण्डले ९ दिन अघि खेलाडीको खातामा अर्को दिनदेखीनै जाने बताएका थिए । तर खेलाडीको खातामा हालसम्म पैसा आएको छैन । सरकारले एसिसी प्रिमियर कपको उपाधि जित्दा जनही ६ लाख रुपैयाँ दिने घोषणा गरेको थियो ।

त्यसअघि आइसिसी विश्वकप लिग-२ त्रिकोणात्मक ओडिआई सिरिजमा दुई र तीन लाख दिने घोषणा गरेको थियो । प्रचण्डले नै सामाजिक सञ्जालबाट घोषणा गरेका थिए । फागुन र वैशाखमा घोषणा गरेको उक्त रकम क्रिकेट खेलाडीले पाउन नसकेका हुन् ।

क्रिकेट टोली आज दिउँसो साढे १२ बजे चीन प्रस्थान गरेको छ । स्पिनर सन्दीप लामिछाने भने बलात्कार मुद्धाको पेशी परेको कारण सोमबार मात्रै जानेछन् । एसियाली खेलकुदमा नेपालले बुधबार मंगोलिया र आइतबार माल्दिभ्ससँग खेल्नेछ ।

नेपाल शीर्षस्थानमा पुग्न सके क्वाटरफाइनल खेल्नेछ । क्वाटरफाइनलमा पाकिस्तान, भारत, बंगलादेश, श्रीलंका र अफगानिस्तान सोझै पुगेका छन् । तीन समूहबाट शीर्ष तीन टोली क्वाटरफाइनलमा पुग्नेछन् । १९ औं एसियाली खेलकुदमा नेपाललाई पदक विजेताको दाबेदारको रुपमा समेत हेरिएको छ । खेल टि२० शैलीमा हुनेछ ।

नेपालको टोली :

रोहित कुमार पौडेल (कप्तान), कुशल भुर्तेल, दीपेन्द्रसिंह ऐरी, आसिफ शेख (विकेटकिपर), कुशल मल्ल, गुलशन झा, करण केसी, अभिनाश बोहरा, सन्दीप लामिछाने, सागर ढकाल, विवेक कुमार यादव, प्रतिश जि।सी, सोमपाल कामी, सन्दीप जोरा र विनोद भण्डारी (विकेटकिपर) ।