एजेन्सी – ओपनर शुभमन गिल र श्रेयस ऐरको शतकको सहयोगमा भारतले दोस्रो ओडिआई खेलमा अष्ट्रेलियालाई ४ सय रनको विशाल लक्ष्य दिएको छ । इन्डोरमा टस हारेर पहिला ब्याटिङ थालेको भारतले निर्धारित ५० ओभरमा ५ विकेट गुमाउँदै ३ सय ९९ रन बनायो ।

भारतका श्रेयस ऐरले ९० बलमा ११ चौका र ३ छक्कासहित सर्वाधिक १ सय ५ रनको शतकीय इनिङ खेले । चोटबाट फर्किएका उनले शतकका साथ विश्वकपमा सुरुवाती रोजाईमा आफ्नो स्थान बलियो बनाएका छन् ।

गिल ९७ बलमा ६ चौका र ४ छक्कासहित १ सय ४ रनमा आउट भए । दोस्रो विकेटका लागि गिल र ऐरले १ सय ६४ बलमा २ सय रनको दोहोरो शतकीय साझेदारी गर्दै विशाल योगफलको आधार तय गरेका थिए ।

कप्तान लोकेश राहुलले ३८ बलमा ३ चौका र ३ छक्कासहित ५२ रन बनाए । ईशान किशन पनि १८ बलमा २ चौका र २ छक्कासहित ३१ रनमा आउट हुन पुगे ।

तल्लोक्रममा सूर्यकुमार यादवले ३७ बलमा ६ चौका र ६ छक्कासहित ७२ रनको विष्फोटक इनिङ खेलेपछि विशाल योगफल बनाएको हो ।

अष्ट्रेलियाका क्यामरन ग्रीनले १० ओभरमा १ सय ३ रन खर्चेर २ विकेट लिए । जोश हेजलवुडले १० ओभरमा ६२ रन खर्चेर १ विकेट लिए । शन एबोटले १० ओभरमा ९१ रन खर्चेर १ विकेट लिए । एडम जाम्पाले १० ओभरमा ६७ रन खर्चेर १ विकेट लिए । तीन खेलको सिरिजमा भारत १-० ले अघि छ ।