एजेन्सी – भारतले १९ औं एसियाली खेलकुद अन्तर्गत महिला क्रिकेट तर्फ स्वर्ण जितेको छ । भारतले फाइनलमा श्रीलंकालाई १९ रनले हराउँदै स्वर्ण जितेको हो ।

जितको लागि १ सय १७ रनको विजयी लक्ष्य पछ्याएको श्रीलंकाले निर्धारित २० ओभरमा ८ विकेट गुमाउँदै ९७ रन बनायो । श्रीलंकाकी भिष्मी गुनारत्ने २२ बलमा ४ चौका र १ छक्कासहित सर्वाधिक २५ रन बनाइन् । त्यस्तै निलक्शी डी सिल्भा २३ र ओशादी रनासिंघे १९ रनमा आउट भइन् । अन्य कुनैपनि ब्याटरले राम्रो प्रदर्शन गर्न सकेनन् ।
भारतकी तीव्र गतिकी बलर तितास सधुले ४ ओभरमा १ मेडनसहित ६ रन खर्चेर सर्वाधिक ३ विकेट लिइन् । राजेश्वरी गायकवाडले दुई विकेट लिइन् ।
त्यसअघि टस जितेर पहिला ब्याटिङ रोजेको भारतले निर्धारित २० ओभरमा ७ विकेट गुमाउँदै १ सय १६ रन बनाएको थियो । भारतकी ओपनर स्मृति मन्धनाले ४५ बलमा ४ चौका र १ छक्कासहित सर्वाधिक ४६ रनको योगदान दिइन् । त्यस्तै जेमिमाह रोड्रिगसले ४० बलमा ५ चौकासहित ४२ रन बनाइन् । श्रीलंकाकी उदीषिका प्रबोधानी, सुगानदिका कुमारी र इनोका रनाविराले समान एक विकेट लिए ।
उता बंगलादेशले पाकिस्तानलाई हराउँदै कास्य जितेको थियो । नेपाली महिला टोली भने एसियाली खेलकुदमा सहभागी थिएन । पुरुष टोलीले भने समूह चरणमा बुधबार मंगोलिया र आइतबार माल्दिभ्ससँग खेल्नेछ ।