काठमाडौं (हाम्रो खेलकुद) – नेपालका शीर्षक्रमका ब्याटर भीम सार्कीलाई स्नातक अध्ययन गर्न फिनिक्स कलेज अफ म्यानेजमेन्टको पूर्ण छात्रवृत्ति प्रदान गर्ने भएको छ । नेपालका ओडिआई टोलीका महत्वपूर्ण सदस्य भीमलाई विविए अध्ययनका लागि पूर्ण छात्रवृत्ति प्रदान गर्ने फिनिक्स कलेजले जानकारी दिएको छ ।

कलेजका निर्देशक अविनाश अधिकारीले भीम शार्कीको क्रिकेट प्रतिको समर्पण प्रशंसनीय हुनुको साथै क्षमता र प्रतिवद्धतालाई सम्मान गर्दै यो छात्रवृत्ति मार्फत उनको शैक्षिक यात्रामा सहयोग गर्न पाउँदा गौरवान्वित भएको वताए।

यसअघि फिनिक्स कलेज अफ म्यानेजमेन्टले राष्ट्रिय क्रिकेट टिमका खेलाडी ज्ञानेन्द्र मल्ल, कुशल भुर्तेल, कमलसिंह ऐरी, सन्दीप जोरा र सूर्य तामाङलाई पूर्ण छात्रवृत्ति प्रदान गरेको थियो।

फिनिक्स कलेज अफ म्यानेजमेन्ट लिंकन विश्वविद्यालयबाट सम्बन्धन प्राप्त गरी एम.बी.ए तथा वि.वि.ए कार्यक्रम सञ्चालन गर्ने नेपालको पहिलो कलेज हो । नेपालको ओडिआई मान्यता जोगाउन भीमको प्रदर्शन महत्वपूर्ण थियो । आइसिसी विश्वकप लिग २ का अन्तिम १२ खेल मध्य नेपालले ११ जित्दा भीमको प्रदर्शन उत्कृष्ट थियो ।

नेपाललाई एसिसी प्रिमियर कपको उपाधि जिताउँदै एसिया कपमा पुर्याउन भीमले फाइनलमा युएईविरुद्ध महत्वपूर्ण योगदान दिएका थिए । नेपालबाट १८ ओडिआई खेल खेलेका भीमले ३ अर्धशतकसहित कुल ४ सय ५९ रन बनाएका छन् ।