काठमाडौं (हाम्रो खेलकुद) – प्रधानमन्त्री कप पहिलो पटक राउन्ड रोबिन लिग र डे शैलीमा हुने भएको छ । नेपाल क्रिकेट संघ(क्यान) को मंगलबार बसेको बोर्ड बैठकले उक्त निर्णय गरेको छ । पूर्व कप्तान पारस खड्का सचिव पदमा निर्वाचित भएर आएसँगै पहिलो बोर्ड बैठकमै उक्त निर्णय गरेका छन् ।

प्रधानमन्त्री कप ७ प्रदेश र तीन विभागीय टोलीबीच राउन्ड रोविनको आधारमा गर्ने निर्णय गरेको छ । त्यस्तै सेमिफाइनल दुई दिवसीय लिग र फाइनल तीन दिवसीय शैलीमा हुने भएको छ । अर्थात सेमिफाइनलका खेल दुई दिनको हुनेछ । फाइनल तीन दिनको हुनेछ । सेमिफाइनल र फाइनल टेस्ट शैलीमा जस्तै डे क्रिकेट हुनेछ ।

पहिलो पटक क्यानले प्रधानमन्त्री कप लिग र डे मा गर्न लागेको हो । यसअघिका पाँच संस्करणका पिएम कप १० टोलीलाई दुई समूहमा विभाजन गरेर आयोजना हुँदै आएको थियो । सेमिफाइनल हुँदै फाइनल खेल्दै आएका थिए । तर क्यानले छैटौं संस्करण देखी फरक शैलीमा आयोजना गर्नेछ ।

यसअघि एक टोलीले कम्तिमा चार बढीमा ६ खेल मात्रै खेल्न पाउथे । अव एक टोलीले कम्तिमा ९ खेल खेल्न पाउनेछन् । यसअघि पिएमकप दुई सातामा सकिदै आएको थियो । अव एक महिना चल्ने देखिन्छ । प्रदेशका खेलाडीले धेरै म्याचहरु पाउनेछन् ।

प्रधानमन्त्री कप २०१७ देखी सुरु हुँदै आएको छ । २०२१ मा टि२० शैलीमा आयोजना भएको थियो । अन्य सबै ५० ओभरको शैलीमा भएका थिए ।