काठमाडौं (हाम्रो खेलकुद) – नेपाल क्रिकेट संघ (क्यान) ले नेपाल प्रिमियर लिग आफैं आयोजना गर्ने भएको छ । मंगलबार बसेको क्यानको बोर्ड बैठकले एनपिएल आगमी वर्ष आफैं आयोजना गर्ने निर्णय गरेको हो ।

शनिबार अध्यक्ष चतुरबहादुर चन्दको नेतृत्वमा निर्वाचित भएर आएसँगै सचिव पारस खड्कासहित बसेको पहिलो बोर्ड बैठकले उक्त निर्णय गरेको छ । क्यानले एनपिएप २०२४ मार्च अप्रिलमा आफै आयोजना गर्ने गरि आवश्यक तयारी अगाढि बढाउने निर्णय गरेको छ ।

त्यस्तै अन्य फ्रेन्चाइज लिग क्रिकेट प्रतियोगिताहरु विदेशी खेलाडी बिना घरेलु लिगमा गर्न दिने निर्णय गरेको छ । एभरेष्ट प्रिमियर लिग (इपिएल) ले विदेशी खेलाडीसहितको लिग आयोजना गर्न माग गरेको थियो । इपिएलको माग एनपिएल प्रतियोगिता सम्पन्न भएपछि बोर्ड बैठकपछिको छलफलपछि मात्रै आयोजना गर्न दिने निर्णय गरेको छ ।

नेपाल टि२० लिग गत पुषमा सम्पन्न भएको थियो । फिक्सिङ, पारिश्रमिक, मालिकको पहिचानै नखुल्ने लगायत विभिन्न कारणले निकै विवादित बन्न पुगेको थियो ।

काठमाडौं र फार वेस्ट युनाइटेडका खेलाडीहरुले हालसम्म पूरा पारिश्रमिक पाउन सकेका छैनन् । यी दुई फ्रेन्चाइज टोलीको मालिक नै सार्वजनिक गरिएको थिएन ।

क्यानले नेपाल टि२० लिगको आयोजना जिम्मा भारतीय सेभेन थ्री स्पोर्ट्सलाई दिएको थियो । सेभेन थ्री स्पोर्ट्सका संस्थापक जतिन अलुवालिया प्रतियोगिताबीचमै भागेर दिल्ली गएका थिए ।

क्यान र सेभेन थ्री स्पोर्ट्सबीच नेपाल टि२० लिग आयोजना गर्न ८ वर्षका लागि ३३ करोड रुपैयाँ दिने सम्झौता भएको थियो । तर पहिलो संस्करणमा बिवादै बिवाद भएपछि क्यानले उक्त सम्झौता रद्द गरेको थियो ।

आम्दानीको प्रमुख आधार क्यानले ठेक्कामा बेचेको भन्दै चर्को आलोचना खेप्नु परेको थियो । तर अवदेखी भने क्यानले आफैं गर्ने निर्णय गरेको छ ।