काठमाडौं (हाम्रो खेलकुद) – एपेक्स अन्तर कलेज क्रिकेट प्रतियोगितामा अन्तर्गत विहीबार कान्तिपुर कलेज अफ म्यानेजमेन्ट एन्ड इन्फोर्मेसन टेक्नोलोजी (केसीएमआईटी) र सेन्ट जेभियर्स विजयी भएका छन् । सेन्ट जेभियर्सले थेम्स कलेजलाई ४२ रन र केसीएमआईटीले इस्लिङटन कलेजलाई ३४ रनले पराजित गरेका थिए ।

मूलपानीको तल्लो क्रिकेट मैदानमा सेन्ट जेभियर्सले निर्धारित २० ओभरमा २ विकेट गुमाउँदै १ सय ५० रन बनाएको थियो । जेभियर्सका रुपेश बस्यालले ६२ बलमा ७२ रन बनाए । सविन दाहालले ४५ बलमा ५१ र प्रिन्सकुमार झाले ९ रन बनाए । थेम्सका सारस खत्रीले १ विकेट लिए ।

जितको लागि १ सय ५१ रनको विजयी लक्ष्य पछ्याएको थेम्सले निर्धारित २० ओभरमा ७ विकेटको क्षतिमा १ सय ७ रन बनायो । थेम्सका लागि सारसले ३९ बलमा २५, विवेन त्वानवासुले २७ बलमा १९ र श्रृजन भण्डारीले १८ रन बनाएका थिए । जेभियर्सका राहुल भुजेल र सुमन श्रेष्ठले २–२ विकेट लिए । सुनीलराज बोगटीले १ विकेट लिए ।

अर्को खेलमा केसीएमआईटीले निर्धारित २० ओभरमा ९ विकेटको क्षतिमा १ सय २० रन बनाएको थियो । केसीइमआइटीका सुवास सापकोटाले ३० बलमा ३२, रोजल पन्तले ३० बलमा २८ र अमित मण्डलले १३ रनको योगदान दिए । इस्लिङटनका सुयस ढकालले १५ रन खर्चेर ३, मिनल तिमिल्सिनाले २ र खालिद हसन अन्सारीले १ विकेट लिए ।

जितको लागि १ सय २१ रनको विजयी लक्ष्य पछ्याएको इस्लिङटन १५।५ ओभरमै ८६ रनमा अल आउट भएको थियो । मिनलले २२ बलमा २७, प्रथम भट्टराईले ४२ बलमा २६ र बिरोन जोशीले ७ रन बनाए । केसीएमआईटीका अमृतराज कार्कीले १६ रन खर्चेर ४ विकेट लिए । सुवासले ३ र अमित मण्डलले १ विकेट लिएका थिए ।