एजेन्सी – विकेटकिपर मोहम्मद रिजवानको शतक, बाबर आजम र साउद सकिलको उत्कृष्ट ब्याटिङको सहयोगमा पाकिस्तानले विश्वकप वार्मअप खेलमा न्युजिल्यान्डलाई ३ सय ४६ रनको विशाल लक्ष्य दिएको छ ।

राजिव गान्धी इन्टरनेल स्टेडियम हैदराबादमा टस जितेर पहिला ब्याटिङ रोजेको पाकिस्तानले निर्धारित ५० ओभरमा ५ विकेट गुमाउँदै ३ सय ४५ रन बनायो ।

पाकिस्तानका मोहम्मद रिजवानले ९४ बलमा ५ चौका र ४ छक्कासहित १ सय ३ रनको शतकीय इनिङ खेले । यो वार्मअप खेल हुँदा ओडिआई मान्यता पाउने छैन । दुबै टोलीले चाहेको खण्डमा टोलीमा भएका सबै खेलाडीलाई खेलाउन सक्छन् । बाबर आजम ८४ बलमा ८ चौका र २ छक्कासहित ८० रनमा आउट भए ।

रिजवान शतकपछि रिटायर्ट आउट हुँदा अघा सलमानलाई मौका दिएका थिए । साउद सकिल ५३ बलमा ५ चौका र ४ छक्कासहित ७५ रनमा आउट भए । ओपनर अब्दुल्लाह शफिक १४ र इमाम उल हक १ रनमा आउट भएका थिए ।

शादब खान ११ बलमा २ छक्कासहित १६ रनमा आउट भए । सलमान २३ बलमा ३ चौका र १ छक्कासहित ३३ रनमा नटआउट रहे । इफ्तिखर अहमद ३ बलमा १ छक्कासहित ७ रनमा नटआउट रहे ।

न्युजिल्यान्डका मिचेल सान्टनारले ८ ओभरमा ३९ रन खर्चेर २ विकेट लिए । लोकी फर्गुसन, म्याट हेनरी र जेम्श निसमले समान एक विकेट लिए ।