हाङ्गचौं (हाम्रो खेलकुद) – नेपाल चीनमा जारी १९ औं एसियाली खेलकुद (एसियाड) मा समूह ए को विजेता बन्दै क्वाटरफाइलमा पुगेको छ । नेपालले आइतबार बिहान माल्दिभ्सलाई १ सय ३८ रनले हराउँदै क्वाटरफाइनलमा स्थान पक्का गरेको हो । पहिलो खेलमा नेपालले मंगोलियालाई २ सय ७३ रनले हराएको थियो ।

समूह बी बाट हङकङ र समूह सी बाट मलेसिया क्वाटरफाइनलमा आउने पक्कापक्की छ । औपचारिकता मात्रै बाँकी देखिन्छ । केहि समयपछि हङकङ र जापानबीच प्रतिस्पर्धा हुनेछ । उक्त खेलको विजेता टोली क्वाटरफाइनलमा पुग्नेछ ।

सोमबार मलेसियाले अन्तिम खेल थाईल्यान्डसँग खेल्नेछ । हारका बाबजुद मलेसिया नेटरनरेटका कारण क्वाटरफाइनलमा पुग्ने समिकरण देखिन्छ । समूह बी मा हङकङ, जापना र कम्बोडिया छन् । समूह सी मा मलेसिया, सिंगापुर र थाईल्यान्ड छन् ।

को खेल्छन् क्वाटरफाइनलमा ?

समूह चरणबाट क्वाटरफाइनलमा चार टोली जानेछन् । अफगानिस्तान नखेली सोझै समूह विजेता बनेको थियो । यस अघि चार समूहमा विभाजन गरिएको थियो । तर अफगानिस्तानले नमानेपछि तीन समूहमा विभाजन गरिएको थियो । त्यसैले समूह चरणबाट अफगानिस्तान, नेपालसहित चार टोली जानेछन् । बाँकी दुई टोलीमा हङकङ र मलेसिया क्वाटरफाइनलमा स्थान बनाउन औपचारितकता बाँकी छ ।

समूह चरणबाट जाने चार टोली क्वाटरफाइनलमा भारत, पाकिस्तान, बंगलादेश र श्रीलंका मध्य एकसँग खेल्नुपर्ने हुन्छ । अर्थात नेपालले क्वाटरफाइनलमा बंगलादेश, श्रीलंका, भारत र पाकिस्तान मध्य एक टोलीसँग खेल्नेछ ।

कोसँग खेल्ने सोमबार मात्रै टुङ्गो लाग्नेछ । क्वाटरफाइनलको टुङ्गो ड्रबाट सार्वजनिक हुनेछ । भारत र पाकिस्तान पर्ने टोलीले क्वाटरफाइनलमा मंगलबार खेल्नेछन् । श्रीलंका र बंगलादेशसँग पर्ने टोलीले बुधबार क्वाटरफाइनल खेल्नेछन् । सेमिफाइनलका दुबै खेल शुक्रबार हुनेछन् । फाइनल र कास्य पदका लागि शनिबार प्रतिस्पर्धा हुनेछ ।