काठमाडौं (हाम्रो खेलकुद) – खेलकुद पत्रकार ११ टि२० मैत्रीपूर्ण खेलमा आयोजक एपेक्ससँग डकवर्थ लेविस पद्धतिको आधारमा ७ रनले पराजित भएको छ । जितको लागि ७२ रनको मध्यम लक्ष्य पछ्याएको खेलकुद पत्रकार ११ ले निर्धारित १२ ओभरमा ९ विकेट गुमाउँदै ६४ रन बनायो ।

जितको लागि सुरुवातमा निर्धारित २० ओभरमा १ सय ३३ रन पाएपनि वर्षाको कारण खेलमा ओभर घट्न पुगेको थियो ।
खेलकुद पत्रकारको लागि सचिन तिमिल्सिनाले २२ बलमा १ छक्का र १ चौकासहित सर्वाधिक ३२ रन बनाए ।

अर्का ओपनर भुपेन्द्र जि.सीले २४ बलमा १२ रन बनाए । पहिलो विकेटका लागि ६ ओभरमा सचिन र भुपेन्द्रले ४५ रनको साझेदारी गरेपनि त्यसपछि खेलकुद पत्रकारले लगातार विकेट गुमाएपछि हार्न पुगेको थियो ।

अन्य कुनैपनि ब्याटरले दोहोरो अंकमा रन बनाउन सकेनने । सरोज नेपालले ३, सन्दीप पौडेल ४, सचिन सुब्बा १, विराट रायमाझी डक, कप्तान प्रारम्भ दाहाल र विशाल पन्त एक एक रनमा आउट भए । त्यस्तै शिषिर पौडेल र प्रज्वल डक आउट भए । एपेक्सका लागि हरिसले तीन, गणेशले चार र सन्देशले एक विकेट लिए ।

त्यसअघि तल्लो मुलपानी क्रिकेट मैदानमा टस जितेर पहिला ब्याटिङ रोजेको एपेक्सले निर्धारित २० ओभरमा ७ विकेट गुमाउँदै १ सय ३२ रन बनाएको थियो । उसका लागि निकेशले सर्वाधिक ३२ रन बनाए । सन्देशले १९ र गणेशले १३ रन बनाए । अर्जुन र लोकेश समान ९ रनमा आउट भए । त्यस्तै प्रकार ११ रन बनाए । खेलकुद पत्रकारले ३३ रन अतिरिक्त दिएको थियो ।

खेलकुद पत्रकारका लागि कप्तान प्रारम्भ दाहलले ३ ओभरमा १८ रन खर्चेर ३ विकेट लिए । विराट रायमाझीले ४ ओभरमा १८ रन खर्चेर २ विकेट लिए । भुपेन्द्र जि.सीले ४ ओभरमा ३० रन खर्चेर १ विकेट लिए । सरोज नेपाल र सचिन तिमिल्सिनाले समान एक विकेट लिए ।

मुलपानीमा एपेक्स कप कलेज क्रिकेट जारी छ । त्यसैक्रममा एपेक्सले खेलकुद पत्रकारसँग अभ्यास खेल खेलेको हो ।