हाङ्गचौं (हाम्रो खेलकुद) – नेपाली क्रिकेट टोलीका तीव्र गतिका बलर अभिनाश बोहराले १९ औं एसियाली खेलकुद (एसियाड) मा देशको लागि एउटा मेडल जित्ने लक्ष्य भएको बताएका छन् । आइतबार माल्दिभ्सलाई १ सय ३८ रनले हराउन कीर्तिमानी ६ विकेट लिएपछि अभिनाशले उक्त प्रतिक्रिया दिएका हुन् ।

‘एकदमै राम्रो लागेको छ । पाँच विकेट लिने सोच थियो । त्यसैले राम्रो लागेको छ’, कीर्तिमानी ६ विकेट लिएपछि अभिनाशले भने । उनी टि२० आईमा ६ विकेट लिने पहिलो नेपाली खेलाडी हुन् । यसअघि करण केसी र सन्दीप लामिछानेले टि२० आईमा एकै खेलमा ५-५ विकेट लिएका छन् ।

अभिनाश माल्दिभ्सविरुद्ध दुई पटक ह्याट्रिक नजिक पुगेका थिए । तर त्यो सफलता पूरा गर्न सकेनन् । ह्याट्रिक भएको भए झनै राम्रो हुने अभिनाश बनाउँछन् ।

‘त्यो ह्याट्रिक भएको भए अरु राम्रो लाग्थ्यो । त्यो नहुँदा केहि निराशा छ’, उनले भने । नेपालले अभिनाशलाई टि२० विशेष खेलाडीको रुपमा खेलाउँदै आएको छ । त्यसैले २०२२ अप्रिलमा टियुमा पपुवा न्युगिनीसँग टि२० आई खेल खेलेपछि उनी टोलीमा थिएनन् । नेपालले पछिल्लो समय लगातार ओडिआई खेलेको हुँदा उनले मौका पाउन सकेका थिएनन् ।

‘पहिलो खेलमा खेल्दा मलाई त्यस्तो लागेको थिएन । तर माल्दिभ्ससँगको खेल खेलमा आफ्नो पूरानो लय फर्किएको जस्तो अनुभव भयो मलाई’, उनले भने ।

नेपालले क्वाटरफाइनलमा भारत, पाकिस्तान, श्रीलंका र बंगलादेश मध्य एकसँग खेल्ने हो । टेस्ट टोलीसँग खेल्ने उनी एउटा राम्रो अवसर भएको बताउँछन् । ‘राम्रो टोलीसँग खेल्ने एउटा अवसर हो । हाम्रो लागि राम्रो खेलपनि हुन्छ । एउटा मेडल यहाँदेखी जित्नुछ । जस्तो सुकै टिम होस् लक्ष्य जित्ने नै हो । राम्रो खेल्नुछ । देशको लागि एउटा मेडल जित्नुछ’, अभिनाशले भने ।